ԱՄՆ պետքարտուղար Էնթոնի Բլինկենը մտադիր է Արկտիկական խորհրդի նախարարական նստաշրջանի շրջանակներում Ռուսաստանի արտգործնախարար Սերգեյ Լավրովի հետ հանդիպման ժամանակ քննարկել երկկողմ հարաբերությունները և «Հյուսիսային հոսք-2» գազատարի նախագիծը: Այս մասին Դանիայում կիրակի օրը հայտարարել է Պետդեպարտամենտի բարձրաստիճան ներկայացուցիչը: Սղագրությունը հրապարակել է ԱՄՆ արտաքին գործերի նախարարությունը:
Պետքարտուղարության ներկայացուցչին հարցրել են, արդյոք Բլինկենը մտադիր է բարձրացնել գազատարի թեման Ռուսաստանի արտգործնախարարի հետ զրույցում: «Կարծում եմ, որ դա կարող է տեղի ունենալ երկկողմ բանակցություններում [Դանիայի իշխանությունների ներկայացուցիչների հետ]: Կարծում եմ՝ նույնը վերաբերում է Լավրովին: Մենք, ինչպես և Կոնգրեսը, շատ հստակ արտահայտել ենք մեր վերաբերմունքը «Հյուսիսային հոսք-2»-ի նկատմամբ և հայտարարել, որ դա Ռուսաստանի ռազմավարական նախագիծ է, որը խաթարում է եվրոպական անվտանգությունը, եվրոպական էներգետիկ անվտանգությունը», ասել է դիվանագետը:
«Մենք չենք ձգտում սրացման, պարզապես ավելի կանխատեսելի, կայուն հարաբերություններ ենք փնտրում: Եվ ես կարծում եմ, որ կան ոլորտներ, որոնց շրջանակներում մենք կարող ենք քննարկել դա արտգործնախարար Լավրովի հետ», – ավելացրել է նա:
