Իրանի ԱԳ նախարարը կառավարության նիստի շրջանակում լրագրողներին ասել է. «Մենք ամերիկյան կողմից տարբեր դիրքորոշումներ ենք լսել, որոնցից մի քանիսը հակասական են, և դա ոչ մի կերպ չի օգնի պատշաճ բանակցային գործընթացին։
Սակայն հանդիպմանը մենք պետք է իմանանք ամերիկյան կողմի իրական տեսակետները։ Եթե նրանք հանդես գան կառուցողական դիրքորոշումներով, հուսով եմ, որ մենք կարող ենք բանակցություններ սկսել հնարավոր համաձայնագրի շրջանակում։ Հակառակ դեպքում, եթե դիրքորոշումները մնան հակասական, աշխատանքը կդժվարանա»։
Պատասխանելով Ռուսաստան իր այցի նպատակի մասին հարցին՝ Արաղչին ասել է. «Իմ նպատակն է Ռուսաստանի ղեկավարին փոխանցել Գերագույն առաջնորդի գրավոր ուղերձը, և տա Աստված, որ այդ ուղերձը նրան փոխանցվի ՌԴ նախագահ Վլադիմիր Պուտինի հետ հանդիպման ժամանակ»։
Բանակցությունների ընթացքում Իրանի վրա շարունակվող ճնշումների մասին ԱԳ նախարարն ասել է. «Ե՛վ մեր դիրքորոշումը, և՛ մեր գործողությունները պարզ են: Նրանք ոչնչի չեն հասնի ճնշմամբ: Եթե բանակցությունները հիմնված լինեն հավասար դիրքորոշումների վրա և հարգալից մթնոլորտում, նրանք կարող են առաջ շարժվել, բայց ճնշում գործադրելով և պարտադրելով իրենց դիրքորոշումները, նրանք ոչնչի չեն հասնի»:
