Թուրքիայի նախագահ Ռեջեփ Թայիփ Էրդողանը ուրբաթ օրը հայտարարել է, որ Սիրիայում Անկարայի պայքարը փոխվելու է: Այս մասին նա լրագրողներին ասել է ուրբաթօրյա աղոթքից հետո:
«Սիրիայում Քրդստանի աշխատավորական կուսակցությունը և Ժողովրդական ինքնապաշտպանության ուժերը ամրապնդվում են ԱՄՆ գլխավորած կոալիցիոն ուժերի աջակցության շնորհիվ: Մենք համբերում էինք մինչև որոշակի պահ, իսկ վերջին անգամ մեր երկու ոստիկան զոհվեց [հարձակումներից]: Մոտակա ժամանակահատվածում նրանց դեմ մեր պայքարը կշարունակվի բոլորովին այլ կերպ: Մենք պայքարելու ենք ինչպես ահաբեկչական կազմակերպությունների դեմ, որոնց աջակցում է ԱՄՆ-ը, այնպես էլ ռեժիմի [Սիրիայի նախագահ Բաշար Ասադի] ուժերի դեմ: Մենք վճռական ենք տրամադրված այս հարցում», – նշել է Էրդողանը:
Վերջերս Անկարայում շատ ավելի հաճախ են հնչում հայտարարություններ Սիրիայի հյուսիսում քրդական կազմավորումների «ներկայությանը վերջ տալու» պատրաստակամության մասին, գրում է ՏԱՍՍ-ը:
