Արաբական Միացյալ Էմիրությունների մայրաքաղաք Աբու Դաբիում մեկնարկել են եռակողմ բանակցություններ՝ Ռուսաստանի, Ուկրաինայի և ԱՄՆ-ի պատվիրակությունների մասնակցությամբ. հայտնել է ուկրաինական բանակցային պատվիրակության ղեկավար Ռուստեմ Ումերովը:
«Բանակցային գործընթացը մեկնարկել է եռակողմ ձևաչափով՝ Ուկրաինա, ԱՄՆ և Ռուսաստան։ Այնուհետև նախատեսվում է աշխատանք առանձին խմբերով՝ ըստ ուղղությունների, ինչից հետո նախատեսվում է դիրքորոշումների կրկնակի սինքրոնացում», – հայտարարել է նա։
Այս տեղեկությունը հաստատել է նաև ռուսական պետական «TASS» գործակալության աղբյուրը։
«Բանակցությունները կարելի է համարել սկսված, լինելու են տարբեր ուղղություններ և ձևաչափեր։ Մամուլի մասնակցություն նախատեսված չէ», – ասել է գործակալության զրուցակիցը։
Աբու Դաբիում ընթացող բանակցություններում ռուսական պատվիրակությունը գլխավորում է ՌԴ ԶՈւ Գլխավոր շտաբի Գլխավոր հետախուզական վարչության պետ Իգոր Կոստյուկովը։ Ամերիկյան կողմից բանակցություններին մասնակցում են Դոնալդ Թրամփի հատուկ բանագնաց Սթիվեն Ուիթքոֆը և ԱՄՆ նախագահի փեսա Ջարեդ Քուշները։ Ուկրաինան բանակցություններում ներկայացնում են, մասնավորապես, Ազգային անվտանգության և պաշտպանության խորհրդի քարտուղար Ռուստեմ Ումերովը և նախագահի գրասենյակի ղեկավար (նախկինում՝ Հետախուզության գլխավոր վարչության պետ) Կիրիլ Բուդանովը։
Ուկրաինայի, Ռուսաստանի և ԱՄՆ-ի եռակողմ բանակցությունների առաջին փուլը տեղի է ունեցել փակ ռեժիմով Աբու Դաբիում հունվարի 23-24-ին։ ԱՄՆ պետքարտուղար Մարկո Ռուբիոն, հունվարի 28-ին ելույթ ունենալով Կոնգրեսում, հայտարարել է, որ տարածքային հարցը միակն է, որը մնացել է չլուծված խաղաղության ծրագրի նախապատրաստման շրջանակներում։ Ուկրաինայի նախագահ Վլադիմիր Զելենսկին իր հերթին նշել էր, որ տարածքների հարցը կարող է լուծվել միայն ՌԴ նախագահ Վլադիմիր Պուտինի հետ իր անձնական հանդիպման պարագայում։
