Մշակել ենք ոսկերչության  և ադամանդագործության հնգամյա ծրագիր, ինչի արդյունքում նախատեսվում է արտադրական ծավալները հասցնել 150 միլիարդի՝ ոսկերչության և 120 միլիարդի՝ ադամանդագործության գծով, այսօր տեղի ունեցած ասուլիսի ժամանակ ասաց ՀՀ էկոնոմիկայի նախարար Գևորգ Պապոյանը։

Անդրադառնալով մեղվաբուծության զարգացման փորձնական ծրագրին՝ բանախոսը տեղեկացրեց, որ այն իրականացվելու է ՀՀ չորս մարզում. մեղվաբույծներին փոխհատուցվելու է մեղվափեթակների 50 տոկոսը։

«2023  թվականը, ցավոք, մեղվաբուծության համար լավ տարի չի եղել, և սա ազդել է ամբողջ բուսաբուծության ոլորտի վրա, որովհետև մեղուները փոշոտում իրականացնող կենդանիներ են։

Կարողացել ենք բուժանյութերի միջոցով լուծել Շիրակի հարթավայրում ի հայտ եկած ստանդարտ չափերից մեծ մկնանման կրծողների հարցը։ Դրանք հսկայական վնասներ են տվել մեր գյուղացիական տնտեսություններին, բայց օպերատիվ կազմակերպեցինք դեղերի գնումները։ Նմանատիպ վիճակ էր ծղրիդների հետ՝ արդեն Գեղարքունիքի մարզում, մնույնպես գյուղացիներին ապահովվեցինք համապատասխան դեղամիջոցներով»,- ասաց նախարարը։

Անդրադառնալով արցախահայության կարիքներին ուղղված ծրագրերին՝ Գևորգ Պապոյանը հիշեցրեց՝ ՀՀ կառավարությունը որոշում է ընդունել, որով Արցախից բռնի տեղահանված անձինքն հնարավարություն կունենան բնակարաններ ունենալ Հայաստանում։

«Ես կարող եմ համարել, որ այդ ծրագիրը լուծված է, այն ընդամենը ժամանակի հարց է։ Բիզնեսի աջակցության տեսանկյունից մենք ունենք բազմաթիվ ծրագրեր, և Լեռնային Ղարաբաղից եկած գործարարները կարող են օգտվել մեր առաջարկած ծրագրերից։ Եթե կան բիզնես-գաղափարներ, ինքս պատրաստ եմ  հանդիպել և քննարկել, թե  ինչ կարող ենք իրենց համար անել։

Եթե աշխարհի զարգացած երկրներում հարյուր հազար փախստական հայտնվեր, միշտ կհայտնվեին վրանային ճամբարներ,  բայց մեր երկրում նման իրավիճակ չի եղել։

Այո՛, մարդն, օրինակ, հյուրանոց է կորցրել, բայց եթե իր առաջարկն այն է, որ պետական բյուջեով իր համար հյուրանոց կառուցենք և տանք, դա շատ դժվար և խնդրահարույց բան է»,- ասաց Պապոյանը՝ նշելով, որ նման քայլ թույլ տալու համար պետությունը պետք է հրաժարվի հանրային նշանակության բազմաթիվ ծրագրերից՝ճանապարհներ, ջրամբարներ կամ թունելներ կառուցելուց, կենսաթոշակները ժամանակին և պատշաճ վճարելուց։

Ամփոփելով Իրանի հետ Հայաստանի տնտեսական գործակցությանը՝ նախարարը նշեց՝ շատ դժվար է ստանդարտ ապրանքատեսակներով մուտք գործել իրանական շուկա, քանի որ իրանական շատ ապրանքատեսակների ինքնարժեքները շատ ցածր են. առավել հեշտ է ապահովվել այն ապրանքների արտահանումը, որոնք Իրանում չեն արտադրվում։