Արդեն ավանդույթ դարձած «Ջիվանու օր» միջոցառումը դարձյալ ամառային Կարծախը դարձրել էր մարդաշատ։
Հյուրերն անխոնջ ոգևորությամբ կտրելով կիլոմետրեր՝ հասել էին աշուղի հայրենի գյուղ՝ մասնակից դառնալու մեծն կարծախցուն նվիրված տոնակատարությանը։
Մասնակիցները նախ ծաղիկներ խոնարհեցին գյուղում տեղադրված Ջիվանու հուշարձանին, ապա շարժվեցին աշուղի տուն-թանգարան։
Թանգարանը հիմնադրվել է 2016-ին «Ջավախքին աջակցություն» հիմնադրամի ջանքերով։
Ցուցապաստառները պատմում են աշուղի մանկության, պատանեկության, զավակների, Ալեքսանդրապոլում և Թիֆլիսում ապրած տարիների մասին։
Ցուցասրահի կենտրոնում Ջիվանու կիսանդրին է, աջ ու ձախ կողմերում՝ սիրելի գործիքները՝ ջութակն ու քյամանին։
Ցուցասրահը հարուստ է նաև հայ և օտարազգի այն մեծերի լուսանկարներով, ովքեր մտերիմ են եղել Ջիվանու հետ, արժևորել նրա արվեստը։
Աշուղի երգերի տարբեր տարիների լավագույն կատարողներն ու մշակողները նույնպես ընդգրկված են թանգարանի ցուցադրությունում:
Հետաքրքրական ու խորհրդավոր է նաև թանգարանի հուշային հատվածը, որտեղ Ջիվանին անցկացրել է մանկության տարիները։ Այն վերականգնել են վերջին տարիներին, համալրել կենցաղային այնպիսի իրերով, որոնք փոխանցում են աշուղի ապրած ժամանակաշրջանի շունչն ու ոգին, կենցաղային բնութագրիչ առանձնահատկությունները։
Սենյակներից մեկում պահպանված է ջրհորը, որի սառնորակ ջուրը վայելելով՝ ակամայից հիշում ու զգում ես աշուղի «Հայրենիքի ջրի» համը։
Ինչ խոսք, թանգարանը կարևոր կառույց է ոչ միայն Ջիվանու ժառանգությունը պահպանելու և արժևորելու համար, այլև այն դառնում է ջավախքահայության հոգևոր-մշակութային արժեքները պահպանելու ու հանրահռչակելու կարևորագույն հնարավորություններից մեկը։
Օրվա տոնակատարության ավարտն ազդարարվեց բաց դաշտում կազմակերպած գեղեցիկ միջոցառումով։
Աշուղի երգարվեստի, գործունեության, մշակութային ժառանգության մասին ելույթներով հանդես եկան պաշտոնական անձինք և մշակութային գործիչները, Ջիվանու արվեստի շունչը տարածեցին տեղի աշուղական երգի ու պարի խմբերը, անհատ կատարողները, Հայաստանից ժամանած Թովմաս Պողոսյանի ղեկավարած Հանրային Ռադիոյի «Սայաթ-Նովա» աշուղական երգի վաստակավոր անսամբլը։
Թող որ կարծախյան ավանդույթ դարձած տոնակատարությունը լինի շարունակական՝ տարածելով ու անմահ պահելով հայ աշուղական երգավեստի վարպետ Ջիվանու շունչն ու հարատևությունը։
Նաիրա ԱԲՐԱՀԱՄՅԱՆ
արձակագիր, մանկավարժ
