«Ես Պոլիս ծնած եմ 1928-ի օգոստոս 16-ին` ցերեկը ժամը 4:30-ին: Լա՞վ»։ Այսպես է հարցազրույցներից մեկի ընթացքում սկսում իր կյանքի պատումը աշխարհահռչակ, հայկական արմատներով լուսանկարիչ Արա Գյուլերը։
Սալվադոր Դալի, Վիլյամ Սարոյան, Ուինսթոն Չերչիլ, Մարիա Կալաս, Ալֆրեդ Հիչքոք, Սերգեյ Փարաջանով…Վարպետի լուսանկարչական արխիվը հաշվում են տասնյակ հազարներով, ըստ որոշ հաշվարկների՝ «Ստամբուլի աչքը» մեզ է թողել լուսանկարների երկու միլիոնանոց ժառանգություն։
Մասնագիտական եզակի մրցանակների արժանացած Արա Գյուլերը շարունակում էր պնդել, որ իր լուսանկարների հաջողության գաղտնիքն…ընկերանալն է։ «Ես բոլորի հետ ընկերանում էի, հետո նոր ռեպորտաժ էի անում: Եթե ուզեմ Ձեզ հետ ռեպորտաժ անել, չեմ ասի, բայց նախ կընկերանամ»,-ասում էր նա։ Եվ գուցե հենց սա է պատճառը, որ լուսանկարները ստացվում էին այդքան բնական ու շարժուն։
Հայաստանի ազգային պատկերասրահում է պահվում վարպետի շուրջ 150 լուսանկար, որոնք այժմ գտնվում են մշակման փուլում։ Հաջորդ տարի պատկերասրահը պլանավորում է կազմակերպել Արա Գյուլերի մեծ ցուցահանդեսը։
Նշենք նաև, որ 2021 թվականին պատկերասրահում հիմնվել է լուսանկարչության բաժին, իսկ այս տարվա հուլիսից բացվել է նաև լուսանկարչության մշտական ցուցասրահը, որտեղ պարբերաբար ներկայացվելու են հայ և միջազգային լուսանկարչության պատմությանն առնչվող ցուցահանդեսներ։
