Նոյեմբերի 17-ին Օպերայի և Բալետի ազգային ակադեմիական թատրոնի բեմահարթակից իր 50-րդ հոբելյանական համերգաշրջանը կավարտի Վանաձորի «Հորովել» երգի-պարի անսամբլը։ Անսամբլի կեսդարյա պատմությունն ամփոփում է հայ ժողովրդական երգի և պարի յուրօրինակ բեմական մշակումներ, որոնք արտիստների արդեն մի քանի սերունդ մեծ նվիրումով ներկայացնում է հանդիսատեսին ինչպես Հայաստանում, այնպես էլ երկրի սահմաններից դուրս։
Անսամբլի ակունքներում կանգնած են այնպիսի արվեստագետներ, ինչպիսիք են՝ ՀԽՍՀ ժողովրդական արտիստներ` Գրիգոր Հախինյանը, որը եղել է անսամբլի առաջին գեղարվեստական ղեկավարը, Վանուշ Խանամիրյանը, Ազատ Ղարիբյանը, Վաղարշակ Կոտոյանը:
Շուրջ 20 և ավել տարի գլխավոր բալետմայստերը եղել է ՀՀ վաստակավոր արտիստ Խաչիկ Մարգարյանը: «Հորովելը» հյուրախաղերով հանդես է եկել 25-ից ավելի երկրներում:
Նոյեմբերի 17-ին Երևանում կներկայացվեն անսամբլի վերջին տարիների նոր պարային բեմադրություններ, աշուղական և գուսանական երգի նոր կատարումներ։ Մինչ այդ՝ հոկտենբերի 21-ին, Գյումրիում և նոյեմբերի 4-ին, Վանաձորում, «Հորովելը» ներկայացել է համերգային ծրագրով:
Երևանյան համերգին գեղարվեստական ողջյուններով հանդես կգան վաստակավոր կոլեկտիվներ Հայաստանի պարի պետական անսամբլը, «Բերդ» պարային անսամբլը, «Բարեկամություն» պարարվեստի պետական անսամբլը, ՀՀ ՊՆ «Սարդարապատ» անսամբլը, ինչպես նաև Թովմաս Պողոսյանը, Արսեն Գրիգորյանը:
