Լևոն Չավուշյանի հիշատակին

Անահիտ Չավուշյանը (Մեծ Բրիտանիա) իր հոր՝ կոմպոզիտոր, Հայկական երաժշտական համագումարի հիմնադիր, ՀՀ արվեստի վաստակավոր գործիչ Լեւոն Չաուշյանի հիշատակին նվիրված երեկոյին, «Արամ Խաչատրյան» համերգասրահում ներկայացրեց հայ կոմպոզիտորների, ինչպես նաև Չավուշյանի ստեղծագործությունները։

Լևոն Չաուշյանը ոչ միայն ականավոր կոմպոզիտոր էր, այլև վաստակաշատ մանկավարժ, հասարակական գործիչ։ Ծնվելով երաժիշտների ընտանիքում՝ սկսել է ստեղծագործել 11 տարեկանից:

Լևոն Ալեքսանդրի Չաուշյանը ծնվել է 1946 թ. մայիսի 10-ին, Երևանում: 1954-62 թթ. սովորել է Պյոտր Չայկովսկու անվան երաժշտական դպրոցում, 1964-73 թթ.՝ Երևանի Կոմիտասի անվան պետական կոնսերվատորիայի ստեղծագործական (պրոֆ. Էդվարդ Միրզոյան) և դաշնամուրային (պրոֆ.՝ Գեորգի Սարաջև) բաժիններում:

1970-2000 թթ. աշխատել է Ռոմանոս Մելիքյանի անվան երաժշտական ուսումնարանում՝ դասավանդելով մասնագիտական դաշնամուրի բաժնում: 1972 թ-ից դասավանդել է​  ԵՊԿ-ի խմբավարական, իսկ 2000 թ-ից՝ ստեղծագործական ամբիոնում: 1979-1986 թթ. եղել է Կոմպոզիտորների միության Քարտուղարության անդամ, 1986-1991 թթ.՝ Հայաստանի կոմպոզիտորների միության նախագահի տեղակալ:

1995 -2000 թթ. աշխատել է Հայաստանի Ֆիլհարմոնիկ նվագախմբին կից Սիմֆոնիկ երաժշտության կենտրոնում՝ որպես նախագահ: 1994 թ.-ից եղել է Հայկական երաժշտական համաժողովի հիմնադիր-նախագահը: 2008 թ. արժանացել է ՀՀ արվեստի վաստակավոր գործչի կոչման, 2017 թ. պարգևատրվել է Երևանի քաղաքապետի Ոսկե մեդալով։ սիմֆոնիկ, գործիքային կոնցերտների, լարային կվարտետների, կամերային-անսամբլային, խմբերգային երկերի և գործիքային այլ ստեղծագործությունների հեղինակ է: 1969 թ. Համամիութենական մրցույթում կոմպոզիտորն իր «Սիմֆոնիկ պոեմ» ստեղծագործությամբ արժանացել է երկրորդ մրցանակի և դափնեկրի կոչմանը: 1974թ. արժանացել է Պետական երիտասարդական մրցանակի: 1983 թ. Փարիզում ՅՈՒՆԵՍԿՕ-ի կոմպոզիտորների 30-րդ միջազգային տրիբունայում հեղինակի երրորդ լարային կվարտետը ընդգրկվել է տարվա 12 լավագույն ստեղծագործությունների ցանկում: 1985 թ. հայ կոմպոզիտորների սիմֆոնիկ ստեղծագործությունների մրցույթում Լ. Չաուշյանի «Անհայտ զինվորին» սիմֆոնիան արժանացել է առաջին մրցանակի:

Կոմպոզիտորը դեռ էլի կստեղծագործեր, սակայն 2022թ. փետրվարի 18-ին հեռացավ կյանքից։ Լևոն Չաուշյանի ստեղծագործական ուղին շարունակում են նրա ընտանիքի անդամները, աշակերտները, որոնք մեծ ներդրում ունեն հայ ժամանակակից կոմպոզիտորական դպրոցի և Երևանի Կոմիատասի անվան պետական կոնսերվատորիայի գործունեության մեջ։

Լևոն Չավուշյանի դուստրը՝ Անահիտ Չավուշյանը, ևս շարունակում է Չավուշյաններից ժառանգած երաժշտական ավանդույթները՝ տարեցտարի կատարելագործելով մասնագիտական հմտությունները։

​ ​  Անահիտ Չաուշյանը ծնվել է Երևանում: Ավարտել է Երևանի Կոմիտասի անվան կոնսերվատորիան (պրոֆ. Վիլլի Սարգսյանի դասարան): Կատարելագործվել է Բրյուսելի Conservatoire Royal-ում՝ պրոֆ. Եվգենի Մոգիլևսկու ղեկավարությամբ և Լոնդոնի Royal Academy of Music-ում՝ պրոֆ. Պասկալ Նեմիրովսկու ղեկավարությամբ: Արժանացել է Accademia Chigianain Siena-ի Պատվո դիպլոմի: Բելգիայի Emmanuel Durlet դաշնամուրային մրցույթի դափնեկիր է: Մասնակցել է Պաուլ Բադուրա-Սկոդայի, Միշել Կամպանելլայի, Լազար Բերմանի, Լեվ Նաումովի և Սթիվըն Հաֆի վարպետության դասընթացներին:​

Մենահամերգներով և կամերային անսամբլների կազմում ելույթներ է ունեցել հեղինակավոր համերգասրահներում (Wigmore Hall, Royal Festival Hall, St. Martin-in-the-Fields, Տոկիոյի Santori Hall, Բրյուսելի Grande Salle du Conservatoire Royal, Փարիզի Gavot Hall և այլ սրահներ): Որպես մենակատար ելույթներ է ունեցել London Soloists Orchestra, Հայաստանի Ազգային ֆիլհարմոնիկ նվագախմբի և այլ սիմֆոնիկ և կամերային նվագախմբերի հետ (Մոցարտի, Բեթհովենի, Ռավելի, Ռախմանինովի, Խաչատրյանի և այլ կոնցերտներ): Ա. Չաուշյանը միջազգային փառատոների մասնակից է (Farley Music Festival, Cheltenham Festival, Blackthorpe Barn Festival, Newbury Festival և այլ փառատոներ):​  Հիմնադրել է Fugata Quintet-ը (Մեծ Բրիտանիա): Եղել է միջազգային մի շարք մրցույթների ժյուրիի անդամ:​

Լևոն Չավուշյանի հիշատակին նվիրված համերգն ի սկզբանե նախատեսված էր Երևանյան միջազգային երաժշտական ​​փառատոնի շրջանակում, սակայն սեպտեմբերին Հայաստանի սահմանին տեղի ունեցած պատերազմական գործողությունների պատճառով այն որոշ ժամանակով հետաձգվեց և տեղի ունեցավ օրերս։

​ Համերգի ընթացքում հնչեցին Կոմիտասի «Շորոր», Ռուբեն Սարգսյանի «Նվիրում Կոմիտասին», Գեղունի Չթչյանի «Հայկական խորաքանդակներ», Վաչե Շարաֆյանի «Անտեսանելի կապուտ թիթեռնիկների ձայները», Գայանե Չեբոտարյանի «Պրելյուդներ», Լևոն Չաուշյանի «Urbi et orbi» և «Sonata N 1» ստեղծագործությունները: