Թեքեյան կենտրոնի ցուցասրահում բացվեց «Վահան Թեքեյան» ամենամյա մրցանակաբաշխության «Կերպարվեստ» և «Դեկորատիվ-կիրառական արվեստ» անվանակարգերում ներկայացված աշխատանքների ցուցադրությունը։
Ի դեպ, 29-րդ տարին անցկացվող մրցանակաբաշխության պատմության մեջ «Դեկորատիվ-կիրառական արվեստ» անվանակարգը ներառվել է 1-ին անգամ։
Միջազգային մրցութին մասնակցելու հայտ էր ներկայացրել շուրջ երկու տասնյակ հեղինակ․ նրանց թվում էին ինչպես արվեստասերներին հայտնի, այնպես էլ ոլորտի նորահայտ անուններ։
ՀԹՄՄ կենտրոնական վարչության անդամ, արվեստագիտության դոկտոր Արա Հակոբյանը ողջունեց ցուցադրության այցելուներին և շնորհավորեց մասնակիցներին։ Վերջինս ղեկավարում է «Կերպարվեստ» և «Դեկորատիվ-կիրառական արվեստ» անվանակարգերի հանձնաժողովները, ինչպես նաև «Վահան Թեքեյան» մրցանակակիր է։
Նա կարևորեց մրցույթին մասնակցությունը, որին մասնակցել և մրցանակների են արժանացել անվանի գեղանկարիչներ, իսկ մրցանակաբաշխությունը դարձել է մշակութային սպասված ձեռնարկ ստեղծագործողների համար։ Արա Հակոբյանն ընդգծեց նաև «Դեկորատիվ-կիրառական արվեստ» անվանակարգի կարևորությունը, որը պահպանում է ազգային մշակույթի նկարագիրը, իսկ ստեղծագործությունների՝ շարքով ներկայանալու հանգամանքը վկայում է արվեստագետների բովանդակային մտածելակերպի, ստեղծագործական մտքի և գաղափարի մասին։
Նշենք, որ «Վահան Թեքեյան» մրցանակաբաշխությունն ամենամյա ձեռնարկ է, որին մասնակցել են ինչպես Հայաստանից, այնպես էլ նրա սահմաններից դուրս։ Միջազգային մրցույթն անցկացվում է 29-րդ անգամ։ Այս տարի այն անցկացվում է 4 անվանակարգում՝ Գրականություն, Հայագիտություն, Կերպարվեստ և Դեկորատիվ-կիրառական արվեստ։ Յուրաքանչյուր անվանակարգի համար մրցանակը 1500 ԱՄՆ դոլարին համարժեք դրամ է։
Armtmm.com
