Այս տարի մայիսի 29-ին Հայաստանյայց առաքելական սուրբ եկեղեցին նշում է Սուրբ Համբարձման տոնը։
Սուրբ Հաբարձման տոնը Սուրբ և Փառավոր օր է մեզ համար, երբ մեր Տեր և Փրկիչ Հիսուս Քրիստոս երկնքի արքայություն Համբարձավ՝ նստելով Հոր աջ կողմում։ Այս մեծագուն և աննման խորհուրդը ոչ միայն իր մեջ պարունակում է փրկագործության ավարտական փուլը, այլև նոր ու պայծառ հույսի դռներ է բացում մեզ համար՝ երկրի վրա ապրող հավատացյալներիս։
Քրիստոս, Ով Խաչվեց, Մահացավ և Հարություն առավ մեր փրկության համար, Համբարձմամբ վկայում է, թե մարդկային բնությունը, մարմինը, ոչ թե միայն դատապարտված է փտելու և կործանվելու, այլ հրավիրված է փառավորվելու, սրբանալու և երկնքի արքայությանը մասնակցելու։ Ինչպես ասում է Սուրբ Աթանասը. «Տերը Համբարձվեց՝ մարդու պատիվը երկինք բարձրացնելով»։
Համբարձման խորհուրդն է այն՝ որ մեր Տերը ոչ թե մեզ թողեց, այլ՝ բարձրացավ որպես մեր առջևից գնացող հովիվ։ Ինչպես Եբրայեցիս նամակում կարդում ենք. «Նա մեզ համար առաջինը մտավ սրբություն՝ մեր գլխավոր Քահանայապետը լինելով» (Եբր. 6:20)։ Համբարձման հետ մենք ստանում ենք վստահություն, որ այն վայրը, ուր գնաց Քրիստոս, մեզ համար ևս պատրաստված է, ինչպես Նա ինքն ասաց. «Գնում եմ, որ տեղ պատրաստեմ ձեզ» (Հովհ. 14:2)։
Սիրելի հավատացյալներ,
Սուրբ Համբարձման խորհուրդը նաև կոչ է մեզ՝ փափագելու երկնավորին և չկապվելու միայն այս անցողիկ աշխարհին։ Ինչպես առաքյալները երկինք նայելով հիացմունքով դիտում էին համբարձվող Տիրոջը, այդպես էլ մենք պիտի հայացքներս բարձր պահենք՝ փնտրելով վերինը։ «Որտեղ որ է Քրիստոս՝ նստած Աստծո աջ կողմում, այնտեղ սրտերն էլ մեր լինեն», ինչպես սովորեցնում է սուրբ Պողոս առաքյալը (Կողոս. 3:1)։
Այս տոնը հրավեր է՝ նորոգելու մեր հավատքը, ամրացնելու մեր հույսը և սրբությամբ առաջնորդվելու այս երկրային ընթացքի մեջ, որպեսզի ժամանակին արժանանանք Տիրոջ խոստացված փառքին։
Թող Համբարձյալ Տերը՝ Քրիստոս մեր Աստվածը, առաջնորդի մեզ դեպի սրբություն և արժանի դարձնի երկնքի արքայությանը՝ ուր Նա բարձրացավ մեզ համար՝ որպես Հավիտենական Միջնորդ։
Ամեն։
Տեր Վրթանես Բաղալյան
