Apple-ի որոշ արտադրանքների, ինչպես նաեւ Dell-ի եւ Lenovo-ի նոութբուքերի մատակարարումները, ամենայն հավանականությամբ, ուշացումների կբախվեն, եթե Չինաստանում COVID-19-ի պատճառով ներդրված լոքդաունը շարունակվի, քանի որ սահմանափակումները ստիպում են արտադրողներին փակվել, նշել են վերլուծաբանները, փոխանցում է Reuters-ը:
Չինաստանի կողմից COVID-19-ի տարածման դեմ ուղղված ջանքերը մայրուղիների եւ նավահանգիստների գերծանրաբեռնվածության է հանգեցրել՝ անթիվ գործարաններ փակելով, որոնք կառավարության հաստատմանն են սպասում վերաբացման համար: Այդ խափանումները տարածվում են համաշխարհային մատակարարման շղթաների վրա:
Apple Inc-ի մատակարար Pegatron Corp-ն այս շաբաթ հայտարարել է, որ կդադարեցնի գործունեությունը Շանհայում եւ Կունշանում գտնվող իր գործարաններում, որտեղ, փորձագետների խոսքով, արտադրում է iPhone 13, iPhone SE գաջեթները եւ այլ հին մոդելներ:
Quanta Computer Inc-ը, որը կազմում է Apple Macbook-ի մոտ երեք քառորդն ամբողջ աշխարհում, նույնպես դադարեցրել է արտադրությունը, ինչը կարող է ավելի մեծ ազդեցություն ունենալ առաքումների վրա:
Վերջնական ազդեցությունը Apple-ի մատակարարման շղթայի վրա անհասկանալի է եւ կախված է գործոններից, այդ թվում՝ լոքդաունների տեւողությունից:
Վերլուծաբանները նշում են, որ ընկերությունը կարող է նաեւ դիտարկել արտադրությունը Շանհայից եւ Կունշանից այլ վայրերում գտնվող գործարաններ տեղափոխելու հնարավորությունը, օրինակ՝ Շենժեն, որը ներկայումս բաց է:
«Apple-ը կարող է դիտարկել Pegatron-ից Foxconn-ին պատվերների փոխանցման հնարավորությունը, բայց մենք ակնկալում ենք, որ ծավալը կարող է սահմանափակվել լոգիստիկ խնդիրների եւ սարքավորումների տեղադրման դժվարության պատճառով»,- ասում է Isaiah Research-ի ավագ վերլուծաբան, Թայբեյում բնակվող Էդդի Խանը:
Huawei Technologies Co Ltd-ի եւ Xpeng Inc-ի ղեկավարները նշել են հսկայական տնտեսական ծախսերը, եթե Շանհայի գործարանները չկարողանան շուտով վերսկսել արտադրությունը:
Շանհայը մոտենում է կարանտինի երրորդ շաբաթվան, եւ առայժմ վերաբացման նշաններ չկան։
Trendforce-ի՝ հետազոտությունների մասով մենեջեր Ֆորեսթ Չենը Reuters-ին ասել է, որ եթե սահմանափակումները մի քանի շաբաթից վերացվեն, ապա վերականգնման հնարավորություն դեռ կա: Սայայն «եթե լոքդաունը երկու ամսից ավելի, ապա վերականգնման ճանապարհ չկա: Դեֆիցիտ կառաջանա»,- ասել է նա։ Որոշ մատակարարներ կարող են փոխել արտադրության երթուղին: Կարող են տուժել նաեւ նոութբուք արտադրողները, այդ թվում՝ Compal Electronics Inc-ը՝ թայվանական ընկերություն, որը համակարգիչներ է արտադրում Dell Technologies Inc-ի եւ Lenovo Group Ltd-ի համար Կունշանում գտնվող իր գործարաններում: Չենի խոսքով՝ Compal-ի նոթբուքերի արտադրության մոտ 50 տոկոսը գտնվում է Կունշանում:
