«Ուժեղ Հայաստան» կուսակցությունից բերման ենթարկված անձանցից մեկն էլ Հասմիկ Ամիրզադյանն է՝ հինգ որդեգրված անչափահաս երեխաների մայր։ Այս մասին այսօր լրագրողների հետ զրույցում նշեց վերջինիս փաստաբան Լուսինե Մարտիրոսյանը՝ միաժամանակ հավելելով, որ չնայած անհրաժեշտ լիազորագրերի առկայությանը՝ իր պաշտպանյալի հետ տեսակցությունը խոչընդոտվել է։
«Ամեն դեպքում, ես բարձրացա Հասմիկ Ամիրզադյանի մոտ։ Զանգահարել ենք Մարդու իրավունքների պաշտպանին, Հակակոռուպցիոն կոմիտեի թեժ գիծ, գրավոր կերպով նաև դիմել եմ կոմիտեի ղեկավարին, խնդրել եմ, որպեսզի վերացնի այս խախտումն ու ապահովվի մեր ներգրավումը»,-ասաց Լուսինե Մարտիրոսյանը։
Նրա խոսքով՝ այս պահին մեղադրանք է առաջադրվել, քննարկվում է խափանման միջոցի հարցը։ Փաստաբանն ասաց՝ այս պահին չի անդրադառնա մեղադրանքին։
«Ամեն դեպքում չի ընդունում մեղադրանքը։ Միայն նշեմ, որ Հասմիկ Ամիրզադյանը 5 որդեգրված անչափահաս երեխա ունի։ Հույս ունեմ՝ այս մասը հաշվի կառնեն»,-ասաց փաստաբանը։
