Պետական-իրավական հարցերի մշտական հանձնաժողովն ապրիլի 30-ի նիստում քննարկեց «Հայաստանի Հանրապետության դատախազության 2020 թվականի գործունեության մասին» հաղորդումը:
ՀՀ գլխավոր դատախազ Արթուր Դավթյանը նշեց, որ 2019-ի համեմատ՝ հանցագործության դեպքերը նվազել են. 2020-ի ընթացքում հանրապետությունում արձանագրվել է հանցագործության 26.468 դեպք:
Հաշվետու ժամանակահատվածում նվազել են նաեւ ավազակություն կատարելու դեպքերը. արձանագրվել է 39 դեպք՝ նախորդ տարվա 62-ի համեմատ: Արձանագրվել է բնակարանային գողության 1258 դեպք՝ 400-ով պակաս 2019-ից: «Մեր ձեռնարկած կանխարգելիչ միջոցառումները եւս դրական ազդեցություն են ունեցել ծավալների նվազման վրա: Մեր հետեւողականության արդյունքում միայն Երեւանի բնակֆոնդի շուրջ 33 տոկոսը զինված է համապատասխան կոդավորված դռներով կամ անվտանգության այլ միջոցներով»,-ասաց դատախազը:
2020-ին սպանության դեպքերն աճել են 3-ով: Վերլուծությունների համաձայն՝ դրանց մեծ մասը կենցաղային շարժառիթի հիմքով է:
Դավթյանն ընդգծեց, որ ամենակարեւոր ձեռքբերումը սեփականության դեմ ուղղված հանցագործությունների նվազումն է, քանի որ վերջին տասը տարիների ընթացքում հատկապես զգալի են եղել բնակարանային գողությունների դեպքերը:
Զեկուցողը բացասական դինամիկայի առումով առանձնացրեց մարդու դեմ ուղղված հանցագործությունների աճը՝ հատկապես հրազենի գործադրմամբ կատարված հանցագործությունները:
«Կոռուպցիայի դեմ պայքարը շարունակել է մնալ մեր առաջնահերթությունը: 2020-ի ընթացքում քրեական հետապնդման է ենթարկվել շուրջ 1356 անձ»,-ասաց Դավթյանը: Ըստ նրա՝ կոռուպցիոն հանցագործություններով բացահայտվել է պետությանը պատճառված շուրջ 227 մլրդ դրամի վնաս:
Ըստ «Համաշխարհային բնակչության գնահատում» միջազգային անկախ կազմակերպության տվյալների՝ 0-100 ինդեքսով սանդղակում հանցագործությունների դեպքերով Հայաստանն ամբողջ աշխարհում զբաղեցնում է 12-րդ տեղը:
2020-ին նկատելի է եղել վիրավորանքի, ատելության խոսքի, ագրեսիայի ծավալների աճ: «Բացասական երեւույթները ռիսկեր են ստեղծում հանցավորության մակարդակի ավելացման համար: Ուստի, հանցածին իրավիճակները կանխելու հարցում պետության միջամտության անհրաժեշտություն կա: Ներկայացվել է համապատասխան օրենքներում փոփոխություններ կատարելու նախաձեռնություն»,-նշեց դատախազը:
Զեկուցողը վստահեցրեց, որ մեր երկրում հանցավորության մակարդակը վերահսկելի է, եւ պատկան մարմինները տիրապետում են իրավիճակին:
ՀՀ գլխավոր դատախազ Արթուր Դավթյանը պատասխանեց պատգամավորների հարցերին: Դրանք վերաբերում էին 2020-ի հանցագործությունների թվի նվազմանը, բռնության կոչերի հիման վրա հարուցված գործերին, ապօրինի գույքի բռնագանձման դեպքերով դատական հայցերին, ձերբակալված անձանց՝ հանցակազմի բացակայությամբ պայմանավորված ազատ արձակման դեպքերին, ՀՀ երկրորդ նախագահ Ռոբերտ Քոչարյանի եւ մյուսների գործերին:
Հանձնաժողովը հաղորդումն ընդունեց ի գիտություն:
