Փոխքաղաքապետի պաշտոնը ոչ, բայց մնացած որ պաշտոնը պետք է, մենք պատրաստ ենք տալու կոալիցիոն գործընկերներին: Այս մասին այսօր մամուլի ասուլիսի ժամանակ նշեց Գյումրիի քաղաքապետի թեկնածու Վարդան Ղուկասյանը՝ պատասխանելով հարցին, թե եթե ինքը կոալիցիայի միջոցով կարողանա զբաղեցնել քաղաքապետի պաշտոնը, արդյոք փոխքաղաքապետի կամ այլ պաշտոններ պատրաստ կլինի տալու իր հետ կոալիցիա կազմած ուժերի ներկայացուցիչներին:
Հարցին՝ արդյո՞ք հայտարարելով, որ փոխքաղաքապետի պաշտոնը պատրաստ չեք զիջել, դուք տաբուներ չեք դնում ձեր հետ գործընկերային դաշտ մտնելու համար, Վարդան Ղուկասյանը պատասխանեց. «Ես շատ համեստ եմ խոսում:
Փոխքաղաքապետի հետ կապված ասեմ՝ ինչու եմ դեմ, որովհետեւ դրանով ես ոնց որ նպաստեմ ինչ-որ մի բանի, որ ասենք ինձ ձերբակալեն, ինքստինքյան փոխքաղաքապետը ստանձնում է դերը և ինքը դառնում է քաղաքապետ։ Այս է պատճառը, թե չէ ես միանշանակ խնդիր չունեմ աշխատելու հետ կապված: Ես այնպիսի ապրելակերպ ունեմ, որ ասենք ինչքան էլ մարդը հարամ լինի, ինձ հետ ինքը մաքուր կպահի, որովհետև ես մաքուր եմ պահում ու մաքուր պահանջում եմ մարդկանցից։ Դրա համար ես վախենալու բան չունեմ, բայց եթե այ այդ սկզբունքը կիրառեն, ոնց որ մենք նպաստենք, որ ՔՊ-ն քայլեր ձեռնարկի: Լոկ դրա համար դեմ եմ փոխքաղաքապետի պաշտոնը տալուն»,-ասաց նա:
Նա կրկին անդրադարձավ Մարտուն Գրիգորյանի՝ իրեն միանալու հարցին. «Գիտեմ, որ ինքը լուրջ հորեղբայրներ ունի, հայր ունի, իրեն խորհուրդ կտան, ինքն էլ 40-ն անց է, թոռնիկ ունեն։ Գիտեմ՝ մարդիկ ապրում են ավելի շատ անունի համար, քան պաշտոնի։ Էտ իրանից ինչ է ներկայացնում, որ էտ պաշտոնը հետագայում ինչ-որ առարկա դառնա, և իրեն թիրախավորեն»։
Հարցին՝ բացառո՞ւմ է, որ Սերժ Սարգսյանը կարող է ազդեցություն ունենալ որոշման վրա, քանի որ Մարտուն Գրիգորյանը նրա խմբակցությունից է, իսկ Սերժ Սարգսյանի և Ղուկասյանի հարաբերությունները լարված են՝ պատասխանեց. «Ես ասում էի՝ կբանակցեմ այն թեկնածուների հետ, որոնք քաղաքի շահն ավելի բարձր են դասում և չեն ղեկավարվում դրսից։ Ես սպասում եմ, ոչ միայն ես, այլև ողջ հայ ժողովուրդը՝ Հայաստանում և Հայաստանից դուրս»։
