Իսրայելում տեղի ունեցող իրադարձությունները խիստ մտահոգիչ են՝ անկախ մեր՝ այդ երկրի նկատմամբ վերաբերմունքից։ Դրանք մեծ ներուժ ունեն ապակայունացնելու ոչ միայն մերձավորարևելյան տարածաշրջանը, որի մաս է կազմում նաև Հայաստանը, այլև անցանկալի լարվածություն և անորոշություն առաջացնել համաշխարհային քաղաքականության մեջ։ Azg.am-ի թղթակցի հետ զրույցում այս մասին ասաց քաղաքագետ Ալեքսանդր Քանանյանը։
«Իսրայելը վերջին տասնամյակում հանդես է գալիս որպես Ադրբեջանին ամենաառաջադեմ սպառազինություններով զինող երկիր։ Դա ամենաողբերգական կերպով անդրադառնում է մեզ վրա»,-ասաց մեր զրուցակիցը։
Ալեքսանդր Քանանյանը միաժամանակ խոր համոզմունք հայտնեց, որ տեղի ունեցողի մեջ Իսրայելը մեղադրելու է Իրանին։
«Չեմ կարող ասել, թե ինչպիսին կլինի մեղադրանքի չափը, բայց Իրանը հավանաբար կհռչակվի տեղի ունեցողի գլխավոր պատասխանատու։ Սա կնշանակի, որ Իսրայելի ցանկությունը կմեծանա ՝ Ադրբեջանի տարածքն օգտագործել Իրանին հարվածելու համար։
ԱՄՆ-ը նվազ լծակներ կունենա Իսրայելի նկատմամբ, և այն, ինչ այսօր տեղի է ունենում Պաղեստինում, շատ արագ և վատթար կերպով կարող է անդրադառնալ նաև մեր տարածաշրջանի վրա։ Սա կնշանակի, որ տարածաշրջանում ամենաթույլ օղակ հանդիսացող Հայաստանը, առանց այդ էլ գտնվելով շատ վատ վիճակում, կարող է առնչվել նոր վտանգների»,- ասաց Ալեքսանդր Քանանյանը՝ հավելելով, որ իրադարձությունների զարգացման արդյունքում Հայաստանը կարող է ուղղակի «ոտնատակ գնալ»։
Հիշեցնենք, որ այսօր առավոտյան ուժգին հրթիռակոծման է ենթարկվել Իսրայելի հարավային և կենտրոնական մասը, այդ թվում Երուսաղեմը։
Իսրայելի պաշտպանության բանակն իր հերթին հայտարարել է «Երկաթե թրեր» ռազմական գործողության մեկնարկի մասին՝ ի պատասխան իսլամիստական ՀԱՄԱՍ շարժման գործողությունների։
