Ռուսաստանը բոլոր դեպքերում հավատարիմ է մնում գործընկերների նկատմամբ իր միջազգային պարտավորություններին. հայտարարել է Ռուսաստանի արտաքին գործերի նախարարությունը։
«Արդյո՞ք Ռուսաստանը իր ավանդական դաշնակիցներին՝ Հայաստանին, Սիրիային, Վենեսուելային և Իրանին, թողնում է Միացյալ Նահանգների ողորմածությանը» հարցին ի պատասխան՝ Արտաքին գործերի նախարարությունը շեշտել է, որ այս մոտեցումն անընդունելի է։
«Մենք արդյունավետորեն համագործակցում ենք Հայաստանի հետ եվրասիական տարածքում ինտեգրացիոն միավորումների շրջանակում։ Եվրասիական տնտեսական միությանը անդամակցությունը իրական, շոշափելի օգուտներ է բերում այդ երկրին։ Միության հիմնական առավելություններից մեկն այն է, որ հարցերը լուծվում են փոխադարձ հարգանքի և անդամ երկրների շահերը հաշվի առնելու հիման վրա՝ առանց քաղաքական նկատառումների։ Ավելին, Հայաստանը մնում է ՀԱՊԿ անդամ՝ դրանից բխող բոլոր իրավունքներով և պարտավորություններով։ Մենք աջակցում ենք Երևանի լիարժեք մասնակցությանը կազմակերպության գործունեությանը, քանի որ դա երկրի անվտանգության անբաժանելի տարր է։ Ռուսական ռազմաբազան և մեր սահմանապահները Հայաստանի և ամբողջ Հարավային Կովկասի անվտանգության կարևորագույն գործոն են։
Մենք կարծում ենք, որ Հայաստանի ղեկավարության արտաքին հարաբերությունների դիվերսիֆիկացման քաղաքականությունը չի նշանակում ավանդական դաշնակիցների հետ համագործակցության սահմանափակում։Ռուսաստանը ակնկալում է, որ Երևանը չի փոխի իր կուրսը՝ հակառուսական դաշինքների չափանիշներին համապատասխանելու համար: Մենք բացահայտորեն մեր հայ գործընկերներին ենք փոխանցում Եվրամիության հետ մերձեցման վերաբերյալ մեր գնահատականները։ Վստահ ենք, որ Հարավային Կովկասի երկրները, այդ թվում՝ Հայաստանը, հասկանում են, որ Բրյուսելի և Վաշինգտոնի հայտարարված բարի մտադրությունների հետևում թաքնված են սառը հաշվարկներ։ Նրանց համար այս տարածաշրջանը, որը պատմականորեն և անբաժանելիորեն կապված է Ռուսաստանի հետ, ոչ այլ ինչ է, քան պոտենցիալ ցավոտ կետ, որը կարող է օգտագործվել մեր երկրին վնասելու համար», – ասվում է Ռուսաստանի արտաքին գործերի նախարարության հայտարարության մեջ։
