Ֆրանսահայ լրագրող Լեո Նիկոլյանն արդեն 6-րդ օրն է «Զվարթնոց» օդանավակայանում հացադուլ է անում։
Երկուշաբթի նա վերադարձել է Երևան, սակայն հենց «Զվարթնոց» օդանավակայանից արգելել են նրա մուտքը Հայաստան։
Ոչ ոք նրան չի պատասխանել ու պարզաբանում չի ներկայացրել, թե ինչ պատճառով է իր մուտքը Հայաստան արգելված։ Ֆրանսահայ լրագրողն էլ որոշել է հենց օդանավակայանում հացադուլ անել։
4 օր առաջ՝ ապրիլի 23-ին, նրան այցելել են ՄԻՊ գրասենյակից, և այլևս ոչ ոք նրա վիճակով չի հետաքրքրվել։
Ստեղծված իրավիճակի վերաբերյալ պարզաբանումներ ներկայացնելու պահանջով արդեն իսկ համապատասխան գրություն է ուղարկվել իրավասու պետական մարմնին. հայտնել են ՄԻՊ-ից։
Azg.am-ը կապ է հաստատել Լեոյի հետ. նա պատմել է, որ արդեն 3 օր անգամ ջուր չի խմում՝ ի նշան բողոքի։
Օդանավակայանում նրան փորձել են համոզել, որ հետ գնա Ֆրանսիա, տոմսն անվճար կտրամադրեն, սակայն Լեոն չի համաձայնել, ասել է՝ ես հետ գնացողը չեմ, ասեք տեսնեմ, թե ինչու է իմ մուտքը Հայաստան արգելված։
Օդանավակայանում նրա վիճակը հսկում են բժիշկները։
Նշենք, որ Լեո Նիկոլյանը Ոսկեպարի դեպքերի առաջին իսկ օրվանից Տավուշում է եղել ու նկարահանումներ իրականացրել, այնուհետև մեկնել է Ֆրանսիա, ամսի 22-ին վերադարձել Հայաստան, սակայն, նրան թույլ չեն տվել դուրս գալ օդանավակայանից դեպի Երևան։
