Իրականում այս 4-5 տարիներին և դրանից առաջ էլ շատ քաղաքական դատեր են եղել, բայց այն, ինչ սրբազանների հետ է կատարվում, իրավական-քաղաքականից այն կողմ կա ևս մեկ ահավոր բան՝ դա մեր համազգային ամոթն է։ Միքայել արքեպիսկոպոս Աջապահյանի գործով դատական նիստից առաջ այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը։
«Վերջերս ստիպված ենք ասել՝ 1937-ից հետո մենք քաղաքական պատճառներով սրբազանների չէինք տեսել ճաղավանդակում»,-հավելեց նա։
Պատգամավորի խոսքով՝ Միքայել սրբազանի խոսքից հասկանում ենք, որ ինքը շարունակում է մնալ ազատության մեջ՝ ի տարբերություն մեզ։
«Մենք բոլորս այսօր բանտարկված ենք»,- ընդգծեց Գեղամ Մանուկյանը։
Խորհրդարանականն անդրադարձավ նաև Վաշինգտոնում ձեռք բերված պայմանավորվածությանը և ստորագրված փաստաթղթերին։ «Կոչ կանեմ վաշինգտոնյան հռչակագիրը երբեք չկոչել եռակողմ. դա Նիկոլ Փաշինյանի և Ալիևի միջև ստորագրված հռչակագիր է, որը վերաբերում է Հայաստանի սուվերեն տարածքին՝ Սյունիքին։ Հրապարակված այն փաստաթուղթը, որը կա ՀՀ վարչապետի պաշտոնական էջում, դրա վերնագիրը և ստորագրված իրական փաստաթղթի վերնագիրն իրականում լրիվ տարբեր են»,- ասաց Գեղամ Մանուկյանը։
