Ռուսական 201-րդ ռազմաբազան ռազմական օգնություն կցուցաբերի Տաջիկստանին, եթե այդ երկրի անվտանգությանը սպառնալիք առաջանա՝ կապված սահմանակից Աֆղանստանում ծավալված իրադարձությունների հետ: ՏԱՍՍ լրատվական գործակալության հաղորդմամբ, այսօր նման հայտարարություն է արել ՌԴ պաշտպանության նախարար Սերգեյ Շոյգուն:
«Իհարկե, մենք անուշադրության չենք մատնի սահմանում տեղի ունեցող իրադարձությունները եւ Տաջիկստանի տարածք տեղաշարժվելու գրոհայինների փորձերը: Հենց այդ պատճառով էլ միանշանակ կարող եմ ասել, որ մեր դաշնակցի՝ Հավաքական անվտանգության պայմանագրի կազմակերպության անդամի հանդեպ սպառնալիք ծագելու դեպքում, իհարկե, Ռուսաստանը կարձագանքի եւ կարձագանքի առաջին հերթին Տաջիկստանի տարածքում տեղակայված 201-րդ բազայի միջոցով»,- լրագրողներին հայտնել է Շոյգուն:
«201-րդ բազան նրա համար էլ այստեղ գոյություն ունի, որ այս տարածաշրջանում պահպանի Կենտրոնական Ասիայում ՀԱՊԿ անդամներից մեկի կայունությունն ու հանգստությունը»,- ասել է Ռուսաստանի պաշտպանության նախարարը…
ԳԵՂԱՄ ՄԿՐՏՉՅԱՆ
