«Վագներ» խմբի ղեկավար Եվգենի Պրիգոժինը տեղեկացրել է, որ Արտյոմովսկ քաղաքը (Բախմուտ) Դոնեցկում վերցվել է լիակատար վերահսկողության տակ, փոխանցել է«Ինտերֆաքսը»։
«Այսօր… Բախմուտը լրիվ վերցրել ենք»,- ասել է Պրիգոժինը, որի հայտարարությունը տարածել է նրա մամուլի ծառայությունը։
Պրիգոժինը շնորհակալություն է հայտնել գեներալներ Սերգեյ Սուրովիկինին եւ Միխայիլ Միզինցեւին, «որոնք մեզ հնարավորություն տվեցին իրականացնել այս ծանր գործողությունը», ինչպես նաեւ նախագահ Վլադիմիր Պուտինին՝ «հայրենիքը պաշտպանելու հնարավորության եւ բարձր պատվի համար», տեղեկացրել է ՌԲԿ-ն։
Սուրովիկինն Ուկրաինայում Միավորված զորախմբերի փոխհրամանատարն է։ Մայիսի սկզբին Պրիգոժինը հայտարարել էր, որ ՄՌԸ-ն մարտական կարգադրություն է ստացել, ըստ որի՝ գեներալը սկսել է պատասխանատու լինել պաշտպանության նախարարության հետ այդ կառույցի փոխգործակցության համար։ Կրեմլում կամ ռազմական գերատեսչությունում սա չեն մեկնաբանել։ Միզինցեւը զբաղեցրել է նախարար Սերգեյ Շոյգուի տեղակալի պաշտոնը նյութատեխնիկական ապահովման գծով։ Ապրիլի վերջին ՌԲԿ-ի աղբյուրները տեղեկացրել էին, որ նա թողել է այդ պաշտոնը, իսկ նրա փոխարեն եկել է Ալեքսեյ Կուզմենկովը։
ՌԴ պաշտպանության նախարարությունն առայժմ չի մեկնաբանել Պրիգոժինի՝ քաղաքը վերահսկողության տակ վերցնելու հայտարարությունը։
Ուկրաինայի պաշտպանության փոխնախարար Աննա Մալյարի խոսքով՝ ուկրաինական կողմը «վերահսկում է այդ շրջանի որոշակի արդյունաբերական եւ ենթակառուցվածքային օբյեկտներ եւ մասնավոր հատվածը»։
Եվգենի Պրիգոժինը վերջին ժամանակներս հրապարակայնորեն հակառակվում է ՌԴ պաշտպանության նախարարությանը։ Մայիսի սկզբին նա հրապարակել էր տեսանյութ, որտեղ հայհոյախառն գոռում էր ՌԴ պաշտպանության նախարարության ղեկավարության հասցեին՝ պահանջելով «Վագներ» ՄՌԸ-ին տրամադրել զինամթերքներ, իսկ հետո սպառնացել էր, որ իր խմբավորումը կհեռանա Բախմուտից։
News.am
