Մենք պատկերացնում ենք, որ իմպիչմենթի գործընթացը հնարավոր է բացառապես փողոցային պայքարի և համաժողովրդական ճնշման արդյունքում։ Պատրաստ ենք այդտեղ ևս մեր մասնակցությունն ունենալ, այսօր լրագրողների հետ զրույցում ասաց «Հայաստան» խմբակցության պատգամավոր Իշխան Սաղաթելյանը:
«Պետք է հասկանալ, թե երբ է այս գործընթացը վերածվում փողոցային համաժողովրդական պայքարի, քանյի որ մենք շարունակում ենք պնդել, որ առանց այդ պայքարի հնարավոր չէ արդյունք ունենալ»,- ասաց պատգամավորը։
Իշխան Սաղաթելյանի խոսքով՝ ինչ-որ շրջանակներ հանրության մոտ փորձում են հաճախ տպավորություն ստեղծել, որ չորս տարի իմպիչմենթ չեն արել, որովհետև չեն ուզել։
«Չենք արել, որովհետև բավարար ստորագրությունները չենք ունեցել։ Եղել են նաև այլ տեխնիկական և այլ խնդիրներ, բայց հիմնական հարցը դա է եղել։ Հիմա մեկ անգամ ևս կրկնում եմ՝ այս բլեֆից պետք է դուրս գանք, գործընթացը սկսելու համար այդ անտեր ստորագրությունները պետք են, պետք է կենտրոնանալ դրա վրա։ «Հայաստան» խմբակցությունը ասում է: Դա կա, կենտրոնացեք ուրիշի վրա»,–ասաց նա։
Վերջում Սաղաթելյանը նկատեց՝ որպեսզի բոլորի համար շատ հստակ լինի, Նարեկ Մալյանն իրենց խոսակիցը չի իմպիչմենթի հարցերով։
«Եթե մենք ունենք այս օրակարգով հարց քննարկելու, դա քննարկելու ենք Հանրապետական կուսակցության հետ, եթե ես խոսելիք ունեմ այս թեմայով, խոսելու եմ Սերժ Սարգսյանի, Հանրապետական կուսակցության գործադիր մարմնի և «Պատիվ ունեմ» խմբակցության հետ, հետևաբար Նարեկ Մայլյանը մեր խոսակիցը չի, ու ինքը պետք է աշխատի այս պրոցեսին շատ չխանգարի, եթե սրտացավ է այս հարցում»։
