Իշխանությունները հայտարարում էին, որ օգոստոսի 8-ից հետո «Արևմտյան Ադրբեջանի» կոնցեպտի թեման փակ է, բայց օգոստոսի 8-ից հետո ավելի շատ են սկսել դրա մասին խոսել, քան երբևէ խոսել են, այսօր ԱԺ ճեպազրույցների ժամանակ ասաց ԱԺ «Հայաստան» խմբակցության պատգամավոր Քրիստինե Վարդանյանը։
Լրագրողներից մեկը հետաքրքրվեց՝ ինչու ընդդիմությունը չի ներկայանում խորհրդարանական նիստերին, և ո՞րն է մանդատները վերցնելու նպատակը, եթե հաջորդ գումարման խորհրդարանում ևս նման գործելաոճ է որդեգրելու։
«Դա մարտավարություն է, որն ազատ ենք որդեգրել. ուզում ենք մասնակցել, չենք ուզում մասնակցել, ուզում ենք Նիկոլ Փաշինյանին անսահման հարթակ տալ խոսելու, թե չենք ուզում։
Ընդդիմությունը վերջին նիստերին չկար, կար հիստերիա, գոռգռոց, վիրավորանք։ Այո՛, մենք այն ուժն ենք, որ ամիսներ շարունակ բոյկոտել է, հետո փոխել է մարտավարությունը»,-ասաց ընդդիմադիր պատգամավորը՝ հիշեցնելով, որ իրենք բացակայա նիստերի համար աշխատավարձ երբեք չեն ստացել։
Անդրադառնալով ներքաղաքական իրավիճակին՝ Քրիստինե Վարդանյանը շեշտեց՝ Նիկոլ Փաշինյանն իր գործողություններով և հռետորաբանությամբ նպաստում է, որ ընդդիմությունը գնա միավորման ճանապարհով։ Նա միաժամանակ չպատասխանեց հարցին՝ արդյոք կայացել է Քոչարյան-Կարապետյան հանդիպում։
«Հիմա կան առողջ քննարկումներ, որոնց արդյունքներն առաջիկայում կդրսևորվեն։ Ես կարևորում եմ, որ կա համագործակցության անհրաժեշտության գիտակցումը։ Դա է միակ ճանապարհը»,- ասաց նա։
Ընդդիմադիր պատգամավորը շեշտեց՝ պատերազմի եռագլուխ դևը Փաշինյանը, Ալիևն ու Էրդողանն են, որի դեմ էլ պայքարում են։
Խոսքն ուղղելով իշխանությանը՝ Վարդանյանն ասաց.
«Հաղթանակ եք տարել, ինչո՞ւ հաղթանակը չեք տոնում, ինչո՞ւ եք ավելի ագրեսիվ, հիստերիկ, ավելի գռեհիկ՝ անգամ երբ մենակ եք։ Կարո՞ղ է ինչ-որ բան է պատահել, կարո՞ղ է խոստացել էիք սահմանադրական մեծամասնություն և չեք կարողացել ստանալ և չգիտեք՝ ինչպես արդարանալ։
Ինձ համար կարևոր է, որ շուրջ 700 հազար մարդ մերժել է Ալիևի սահմանադրություն ունենալը, Հայաստանից տարածքներ զիջելը, եկեղեցու դեմ արշավը։ Ես հասկանում եմ, որ Փաշինյանն Ալիևի մոտ չի կարողանում արդարանալ՝ ինչպես է 700 հազար մարդ մերժել իրեն, և ինքը սահմանադրական մեծամասնություն չի ստացել»,- ամփոփեց Վարդանյանը։
