Որտե՞ղ են Ասադը, նրա կինն ու երկու երեխաները. Reuters
Բաշար ալ-Ասադի, նրա կնոջ՝ Ասմայի և նրանց երկու երեխաների գտնվելու վայրը մնում է անհայտ:
Ասադը, ապստամբների անսպասելի առաջխաղացումից ի վեր, հանրության առաջ չի խոսել։ Իսկ ապստամբները հանկարծակի գրոհով գրավեցին հյուսիսային Հալեպը, փլուզվեց առաջնագիծը, հետո մի շարք քաղաքներ անցան գրոհայինների ձեռքը:
Բանակի երկու բարձրաստիճան սպաներ Reuters-ին ասել են, որ նա կիրակի օրը մեկնել է Դամասկոսից անհայտ ուղղությամբ:
Համաձայն Flightradar կայքի տվյալների՝ սիրիական ավիաընկերության ինքնաթիռը օդ է բարձրացել Դամասկոսի օդանավակայանից այն ժամանակ, երբ հաղորդվում էր, որ մայրաքաղաքը գրավել են ապստամբները:
Ինքնաթիռը սկզբում թռել է դեպի Սիրիայի ափամերձ շրջան՝ Ասադի ալավիական աղանդի հենակետը, բայց հետո կտրուկ շրջադարձ է կատարել և մի քանի րոպե թռել հակառակ ուղղությամբ՝ անհետանալով ռադարներից:
Reuters-ը չի կարողացել անմիջապես պարզել, թե ով է եղել օդանավում։
Երկու սիրիական աղբյուրներ ասում են, որ շատ մեծ հավանականություն կա, որ Ասադը կարող է զոհվել ավիավթարի հետևանքով, քանի որ առեղծված է, թե ինչու ինքնաթիռը անսպասելի շրջադարձ կատարեց և անհետացավ ռադարներից:
«Նա անհետացել է ռադարից, հնարավոր է, որ հաղորդիչն անջատված է եղել, բայց ես կարծում եմ, որ ավելի մեծ հավանականությունն այն է, որ ինքնաթիռը խոցվել է…», – ասել է սիրիական աղբյուրը:
Քանի որ վերջին շաբաթվա ընթացքում ապստամբների առաջխաղացումը մեծացավ, ենթադրություններ կան, որ նա կարող է ապաստան փնտրել Մոսկվայում կամ իր մյուս գլխավոր դաշնակից Իրանում:
