Ոստիկանությունը ձերբակալել է Ավագանու «Ազգային առաջընթաց» խմբակցության անդամներ Հայկ Գրիգորյանին և Ռոբերտ Ծովյանին այն բանի համար, որ նրանք փորձել են թույլ չտալ, որ Թումանյան փողոցում ծառեր հատվեն։
Քաղաքապետարանի տասնյակ աշխատակիցներ հարձակվել են նրանց վրա։
Այս առնչությամբ նախկին քաղաքապետ, «Ազգային առաջընթացի» թիմակից Հայկ Մարությանը հանդես է եկել հայտարարությամբ։
«Այսօր մի քանի խուլիգաններ հանրային վայրում հարձակվել են Երեւանի ավագանու մեր «Ազգային առաջընթաց» խմբակցության անդամների վրա, որոնք իրենց քաղաքացիական դիրքորոշումն էին արտահայտում Երեւանի կանաչ ֆոնդի ոչնչացմանը միտված՝ ՔՊ իշխանության քաղաքականության հանդեպ։
Ներկայումս ոստիկանությունը ձերբակալված է պահում «Ազգային առաջընթաց» խմբակցության անդամներ Ռոբերտ Ծովյանին եւ Հայկ Գրիգորյանին։
Իշխանության որդեգրած՝ քաղաքական հալածանքների այս գործելաոճը պայմանավորված է բացառապես նրանց ստեղծված թայֆայական համերաշխության եւ անպատժելիության մթնոլորտով։ Իրավապաշտպան կազմակերպություններին հորդորում ենք համապատասխան գնահատական տալ իշխանության կամայականություններին»,-գրել է Մարությանը:
