Ոստիկանն առանց հաշվի առնելու, որ Պռոշյան-Դեմիրճյան խաչմերուկում մանկասայլակներով երեխաներ կան, տարեցներ, կանայք կան, անորոշ ուղղությամբ, լուսաձայնային նռնակ կիրառեց։ Այս մասին այսօր՝ հունիսի 4-ին, Ֆրանսիայի հրապարակում հրավիրված մամուլի ասուլիսին ասաց փաստաբան Ալեքսանդր Կոչուբաեւը։
«Պահանջ չէր հնչեցվել, որ օրինակ՝ երթեւեկելի գոտին ազատվեր, հավաքն այլ վայր տեղափոխվեր, ինչը հատուկ միջոցի գործադրումը հատում է Քրեական օրենսգրքի մի շարք հոդվածների հետ։ Հատուկ միջոցի կիրառման դեպքում ոստիկանը պետք է հաշվի առնի ստեղծված իրավիճակը, ինչպես նաեւ այդ կիրառման հետեւանքները։ 2018 թվականին 100 մետր վերեւ այդ լուսաձայնային նռնակը կիրառելու համար այսօր քրեական գործ է քննվում, կան մեղադրյալներ։ Ես վստահ եմ, որ այդ ոստիկանն անգամ ծառայողական քննության չի ենթարկվելու, որովհետեւ այնտեղ էին գտնվում իրենց լկտի վարքագծով աչքի ընկած իրենց ղեկավարները,- նշեց նա։
Կոչուբաեւի խոսքով՝ հատուկ միջոց կիրառելը պետք է որոշակի նպատակ ունենա. «Օրենքը սպառիչ ասում է՝ ոստիկանի վրա հարձակում կանխելը, հանցանք կատարած անձի փախուսը կանխելը, հասարակության անվտանգության սպառնալիքը կանխարգելելը, ո՞րն էր այդ իրավիճակը, բացարձակ ոչ մեկը»։
Փաստաբանն ընդգծեց, որ լուսաձայնային նռնակը կիրառվեց՝ վախի մթնոլորտ ձեւավորելու եւ քաղաքացիներին ահաբեկելու նպատակով։
Անդրադառնալով Արցախյան պատերազմում զոհվածի որդու՝ Սերգեյ Ասատուրովի նկատմամբ ոստիկանների կողմից բռնություն գործադրելուն՝ Ալեքսանդր Կոչուբաեւն ասաց.
«Ըստ ոստիկանի՝ ինքը Ֆրանսիայի հրապարակից տեսել է, թե ինչպես է պարոն Ասատուրովը Դեմիրճյան փողոցում զանգվածային անկարգություններ կատարում։ Եվ այդ ոստիկանի ասածի հիմքով էլ Ասատուրովը ձերբակալվեց, այն էլ՝ զանգվածային անկարգության մասնակցի կողմից ոստիկանի նկատմամբ բռնություն կիրառելու համար։ Ասատուրովին գանգուղեղային վնասվածքով ձեռնաշղթա են հագցնում. եւ ո՞ւր են միջազգային կառույցները։ Նախկինում եթե անգամ ձեռնաշղթան ոչ համաչափ կիրառվում էր, դեսպանատնից լալահառաչ տեքստեր էին գալիս Ոստիկանություն՝ էս ինչ եք անում»։
Հիշեցնենք, որ ԱԺ ընդդիմադիր «Հայաստան» եւ «Պատիվ ունեմ» խմբակցությունները նախօրեին նախաձեռնել էին ԱԺ արտահերթ նիստ, որի օրակարգում ԱԺ հայտարարության նախագիծն էր՝ հայ-ադրբեջանական եւ հայ-թուրքական հարաբերությունների կապակցությամբ, սակայն ՔՊ-ական պատգամավորները չէին ներկայացել նիստին եւ տապալել էին այն: Նիստը վարող ԱԺ նախագահ Ալեն Սիմոնյանը հայտարարել էր, որ գրանցումը շարունակվում է մինչեւ անհրաժեշտ թվով պատգամավորների գրանցումը, բայց ոչ ավելի, քան 4 ժամ: 4 ժամը լրացել էր ժամը 20։00–ին, որից հետո ընդդիմադիր պատգամավորները վերադարձել էին Ֆրանսիայի հրապարակ, որտեղից էլ երթով հասել էին Կառավարության շենք եւ շրջափակել բոլոր մուտքերը:
Մոտ երեք ժամ անց շարժման անդամները բացել էին Կառավարության բոլոր մուտքերը եւ շարժվել դեպի Կառավարական առանձնատուն, որտեղ՝ ըստ Իշխան Սաղաթելյանի, գտնվում էր Նիկոլ Փաշինյանը։
Երբ ցուցարարները ցանկանում էին շարժվել դեպի Ազգային ժողով, ոստիկանները հրաժարվել էին բացել ճանապարհը, որից հետո ոստիկանների եւ ցուցարարների միջեւ բախում էր սկսվել։ Ոստիկանները բիրտ ուժ կիրառելով, անգամ հարվածներ հասցնելով բերման էին ենթարկել բազմաթիվ ցուցարարների։ Նրանք նաեւ հատուկ միջոցներ էին կիրառել, մասնավորապես՝ ծխարձակող, լուսաձայնային նռնակներ։ Բազմաթիվ քաղաքացիների ինքնազգացողությունը վատացել է, այդ թվում՝ ոստիկանների։ Մի քանի տասնյակ քաղաքացի եւ ոստիկան տեղափոխվել է հիվանդանոց։
