ԻԻՀ նախագահին տեղափոխող ուղղաթիռի ողբերգական վթարը Թեհրան-Բաքու շփումների ակտիվացման շրջանում
Վերջին շրջանում իրանական կողմը հետեւողականորեն զբաղվում է «զանգեզուրյան» միջանցքի փոխարեն իրանական տարածքով Ադրբեջանը նախիջեւանին կապող «Իրանուղի» անվանումն ստացած ճանապարհի շինարարությամբ։
ԻԻՀ նախագահի գլխավորած պատվիրակության՝ Ադրբեջանի հետ սահմանային գոտի այցելությանն ընդառաջ, շինարարական աշխատանքների ընթացքը վերահսկելու նպատակով շինհրապարակ այցելած Իրանի Արեւելյան Ատրպատականի նահանգապետը մամուլի ներկայացուցիչներին տված հարցազրույցի ժամանակ նախագծի իրականացումը համարել էր «ազդեցիկ» դիվանագիտության արդյունք, որն ի զորու է բարձրացնելու Իրանի տարածաշրջանային հեղինակությունը։ Նահանգապետը խոսել է նաեւ Ադրբեջանի հետ իրականացվող մյուս համատեղ ծրագրերի՝ «Քըզ-քալեսի» եւ «Խուդաֆերին» ջրամբարտակների կառուցման մասին, որոնց պաշտոնական բացումը տեղի ունեցավ մայիսի 19-ին՝ Ադրբեջանի ու Իրանի նախագահների մասնակցությամբ։
Ըստ իրանական ու ադրբեջանական մամուլում հրապարակված նյութերի, ջրամբարտակների բացման արարողության ժամանակ ԻԻՀ նախագահն ասել է, որ Ադրբեջանի հետ Իրանի հարաբերություններն ավելի շատ ազգակցական կապերի վրա են հիմնված, քան՝ դրացիական կապերի։ Նախագահ Ռայիսիսին նաեւ Արցախն «ազատագրելու» համար շնորհավորել է իր ադրբեջանցի գործընկերոջը, հավելելով, որ Իրանը կարեւորում է երկրների տարածքային ամբողջականությունն ու թերեւս առաջին երկրներից էր, որ հստակորեն հայտարարել է Ղարաբաղի ադրբեջանապատկան լինելու մասին։
Ի պատասխան ԻԻՀ նախագահի ջերմ մաղթանքների, Ալիեւն իր իրանցի գործընկերոջը դիմել է մահմեդական կրոնի բարձրագույն հոգեւորական տիտղոսով՝ «ալաթոլլահով» եւ նշել, որ աշխարհն այսօր խոսում է ադրբեջանա-իրանական բարեկամության մասին։
Ցավոք, ջրամբարտակների բացման արարողությանը մասնակցելուց հետո ԻԻՀ նախագահին տեղափոխող ուղղաթիռը տունդարձի ճանապարհին վթարի է ենթարկվել։
Իրանական «Շարղ» թերթի փոխանցմամբ, ԻԻՀ նախագահ Էբրահիմ Ռայիսիից բացի, զոհվել են նաեւ պատվիրակության մյուս անդամները՝ արտգործնախարար Մոհսեն Ամիր-Աբդոլլահիանը, Թավրիզի ուրբաթօրյա քարոզապետ Մոհամմադ Ալի Ալ Հաշեմը եւ Արեւելյան Ատրպատականի նահանգապետ Մալեք Ռահմաթին։
Գրիգոր Առաքելյան
