Նույնիսկ կարևոր չէ՝ վերջնարդյունքում կկայանա՞ Ուկրաինայի նախագահի այցը Հայաստան, թե ոչ, որովհետև այցի մասին լուրը մեր տեղեկատվական դաշտում որպես առանձին երևույթ չհայտնվեց։ Այդ շրջանում Նիկոլ Փաշինայնը մեկնեց Մյունխեն և Փարիզ և սկսեց տեղեկատվական հարձակումներ իրականացնել Ռուսաստանի դեմ։ Azg.am-ի թղթակցի հետ զրույցում այս մասին հիշեցրեց քաղաքագետ Բենիամին Մաթևոսյանը՝ անդրադառնալով շրջանառվող տեղեկություններին, որ տարածաշրջանային այցի շրջանակներում մարտի 4-ին սպասվում է Ուկրաինայի նախագահ Վլադիմիր Զելենսկու այցը Երևան։
Ըստ մեր զրուցակցի՝ Մյունխեն և Փարիզ կատարած այցերի ընթացքում Նիկոլ Փաշինյանը ֆիքսեց, որ ուկրաինական ճգնաժամը պետք է լուծվի ըստ Ալմաթայի հռչակագրի կետերի, ինչը նշանակում է, Ղրիմը, Դոնբասը և մյուս հողերն ուկրաինական տարածքներ են։
«Բայց ամեն ինչից զատ՝ սա հակասում է Ռուսաստանի Դաշնության ներքին օրենսդրությանը, որովհետև, երբ 2022 թվականին ՌԴ նախագահ Վլադիմիր Պուտինը հրամանագիր ստորագրեց, որով Դոնեցկը, Լուգանսկը, Զապորոժիեն և Խերսոնը դառնան ՌԴ մաս, այդ հրամանագիրը հետագայում հաստատվեց թե՛ Պետդումայի , և թե՛ ՌԴ սահմանադրական դատարանի կողմից։
Այսինքն՝ Նիկոլ Փաշինյանը գործողություններ է կատարում Ռուսաստանի դեմ։ Սա այն դեպքում, երբ ՌԴ-ն մշտապես հայտարարում է, որ իր համար Ղրիմի դեմ Արևմուտքի հնարավոր գործողությունները կարմիր գիծն են, և այդ գիծը խախտելու դեպքում Մոսկվան իրեն իրավունք կվերապահի ցանկացած տիպի զենքի և հատուկ միջոցների կիրառումը»,- նկատեց քաղաքագետը։
Բենիամին Մաթևոսյանի խոսքով՝ Հայաստանը, փաստորեն, նույնպես կարծում է, որ Ղրիմն ուկրաինական տարածք է ։
«Այս ամենն ընդհանուր համայնապատկերի մի մասնիկն է, իսկ համայնապատկերը հետևյալն է. Հայաստանը քաղաքական առումով պատերազմ է հայտարարել Ռուսաստանին, Նիկոլ Փաշինյանն անձնապես պատերազմ է հայտարարել ՌԴ-ին։
Ինչ վերաբերում է Հայաստանում Արևմուտքի դիրքերի ամրապնդմանը, ապա շատերի մոտ թյուր կարծիք կա, որ դրանից հետո Հայաստանը կշարունակի գոյություն ունենալ, իսկ Արևմուտքն ուղղակի ավելի հզոր կլինի, քան Ռուսաստանը։ Բայց խնդիրն այն է, որ մենք ոչ թե կշարունակենք մնալ որպես Արևմուտքի գործընկեր Հայաստան պետություն, այլ այստեղ կձևավորվի, այսպես կոչված «Արևմտյան Ադրբեջան»»,- ամփոփեց մեր զրուցակիցը։
Հիշեցնենք, որ ավելի վաղ հայկական մամուլում տեղեկություն էր հայտնվել այն մասին, որ Զելենսկին առաջիկայում կայցելի Երևան, ըստ որոշ տեղեկությունների՝ այցը կկայանա արդեն մարտի 4-ին: ՀՀ արտգործնախարարությունը ո՛չ հերքել, ո՛չ էլ հաստատել էր տեղեկությունը՝ հայտարարելով, որ «բարձր մակարդակի այցերի մասին տեղեկատվությունը տրամադրվում է պատշաճ ժամկետներում»:
Հիշեցնենք նաև, որ օրերս ՀՀ վարչապետ Նիկոլ Փաշինյանը վերահաստատել էր՝ Ուկրաինայի դեմ պատերազմում Հայաստանը Ռուսաստանի դաշնակիցը չէ։ Մոսկվան իր հերթին հայտարարել էր, որ ի գիտություն է ընդունում Երևանի դիրքորոշումը։ «Դա կարևոր հայտարարություն է», – ասել էր ՌԴ նախագահի մամուլի խոսնակ Դմիտրի Պեսկովը։
