ՔԿՀ-ներում սնունդը շատ վատ վիճակում է, նայում ես՝ չես կարողանում ուտել, այսօր «Նուբարաշեն» ՔԿՀ-ում տեղի ունեցած դեպքի վերաբերյալ քննարկման ժամանակ ասաց իրավապաշտպան Ժաննա Ալեքսանյանը:
«Մարդն իրավունք ունի նորմալ սնվելու, լողանալու։ Նախարարը կամ Քրակատարողական ծառայության նոր պետը դատապարտյալի՝ տարրական լողանալու հարցը չեն լուծում, կանչում են սպեցնազին, որ ֆիզիկական ո՞ւժ կիրառի։ Թող խոսեին այդ դատապարտյալները, ասեին՝ ինչ է տեղի ունեցել, և կոմունիստական դարավոր կեղծիքները կբացահայտվեին»,- ասաց բանախոսը։
Ժաննա Ալեքսանյանի խոսքով՝ ՔԿՀ-ներում ընդհանուր առմամբ շատ վատ վիճակ է, պրոբացիոն ծառայությունում իրեն բազմիցս հավաստիացրել են, որ, օրինակ, 40 օրից ավելի հացադուլի մեջ գտնվող դատապարտյալի զարկերակային ճնշումը նորմալ է, մարդն առույգ վիճակում է։
«Գիտե՞ք՝ ինչ հոգեբանությամբ է առաջնորդվում Քրեակատարողական ծառայությունը. թող հանցագործություն չկատարեն, բանտ չընկնեն։ Լրիվ, ամբողջությամբ փակել են ՔԿՀ-ների առօրյան։ Երբ որ լավ է՝ ասում եմ՝ լավ է, երբ վատ է՝ ասում եմ, որ վատ է»,- ասաց իրավապաշտպանը։
ՀՀ արդարադատության նախարարության Քրեակատարողական ծառայության Սոցիալական, հոգեբանական և իրավական աշխատանքների բաժնի պետի տեղակալ Հովհաննես Մարգարյանը շեշտեց, որ իրենք երբեք չեն թաքցրել «Նուբարաշեն» ՔԿՀ-ում առկա պահման վատ պայմանները, սակայն բարելավման ուղղությամբ պարբերաբար աշխատանքներ են տարվում։
Նա միաժամանակ տեղեկացրեց, որ այժմ ընթանում են միջազգային չափանիշներով նոր ՔԿՀ-ի կառուցման նախագծահաշվարկային աշխատանքները, ինչի արդյունքում «Նուբարաշեն» ՔԿՀ-ն կփակվի։
