Փետրվարի 21-ին ու 22-ին «Եվրանեսթի» երկու հանձնաժողովները Երևանում նիստեր են անցկացնելու, որոնց, հավանաբար, մասնակցելու է նաև ադրբեջանական պատվիրակությունը: «Եվրանեսթի» հայկական պատվիրակության ղեկավար Մարիա Կարապետյանը լրատվամիջոցներին հաղորդել էր, որ նիստին մասնակցելու համար դեռևս քննարկվում է ադրբեջանցի երեք պատգամավորի Երևան գալու հարցը:
«Փաստինֆո»-ի հետ զրույցում «Պատիվ ունեմ» խմբակցության քարտուղար Հայկ Մամիջանյանը, որը նաև «Եվրանեսթի» հայկական պատվիրակության անդամ է, նշել է, որ որևէ հստակ տեղեկություն չունի ադրբեջանական պատվիրակության՝ Երևան ժամանելու մասին, սակայն ընդգծել, որ դա որևէ դեպքում չպետք է խոչընդոտ հանդիսանա հայկական պատվիրակության համար. ««Եվրանեսթի» շրջանակներում անձամբ ես պատրաստվում եմ բարձրաձայնել մեր երկրի առջև ծառացած բոլոր խնդիրների մասին՝ գերիներից մինչև մեր երկրի սուվերեն տարածքում ադրբեջանական զինյալների ներկայություն, Ղարաբաղյան հակամարտության հետ կապված անընդունելի հռետորիկա և այսպես շարունակ, բարձրաձայնելու եմ այն բոլոր խնդիրները, որոնք հուզում են հայրենասեր քաղաքացիներին, իմ հռետորաբանությունը բացարձակ չի փոխվելու՝ անկախ նրանից՝ ադրբեջանցիները դահլիճում են ներկա, տեսակապով են լսում, թե չեն լսում առհասարակ»,-ասել է պատգամավորը:
Իսկ թե առհասարակ ինչպե՞ս է վերաբերվում ադրբեջանական պատվիրակության Երևան ժամանմանը, Հայկ Մամիջանյանը արձագանքել է՝ բացասական.
«Ինչպե՞ս կարելի է սա դրական համարել: Ես համարում եմ, որ ցանկացած միջազգային կառույց պետք է օգտագործել՝ մեր երկրի առջև ծառացած խնդիրները բարձրաձայնելու համար, «Եվրանեստ» ֆորմատի Ադրբեջանը կա, բայց դա չպետք է մեզ համար խոչընդոտ հանդիսանա, հակառակը՝ պետք է գործիք հանդիսանա, որպեսզի նաև այս հարթակում Ադրբեջանի առջև դրվեն այն բոլոր խնդիրները, որոնք առկա են»,-ասել է ընդդիմադիր պատգամավորը:
