Հունաստանում բախվել են մարդատար և բեռնատար գնացքներ, ինչի հետևանքով առնվազն 32 մարդ է զոհվել, մի քանի տասնյակ մարդ էլ վնասվածքներ է ստացել:
Դժբախտ պատահարը տեղի է ունեցել գիշերը` Տեմպե բնակավայրի տարածքում. հաղորդում է 1lurer-ը:
Ուղևորատար գնացքում շուրջ 350 մարդ է եղել: Գնացքն Աթենքից ուղևորվում էր Սալոնիկ: Բեռնատար գնացքը շարժվել է հակառակ ուղղությամբ:
Բախման հետևանքով ուղևորատար գնացքի առաջին երեք շարժակազմերը դուրս են եկել գծերից, հրդեհ է բռնկվել: Տեղի ունեցածի հանգամանքները պարզվում են:
85 տուժածներից 25-ի վիճակը գնահատվում է ծանր:
Նշենք, որ քիչ առաջ ՀՀ ԱԺ նախագահ Ալեն Սիմոնյանը Հունաստանում տեղի ունեցած դժբախտ պատահարի կապակցությամբ ցավակցություն հայտնեց։
