Հովհաննավանքում մատուցված պատարագին ես ինքս էլ եմ մասնակցել և բացառապես դրական եմ դրան վերաբերվում, այսօր լրագրողների հետ զրույցում նշեց Կադաստրի կոմիտեի նախագահ Սուրեն Թովմասյանը՝ անդրադառնալով Հովհաննավանքում կարգալույծ հռչակված Ստեփան Ասատրյանի կողմից կիրակի օրը մատուցված «պատարագին»։
«Եթե գոյություն ունեն կարգեր և կանոններ, բոլորս ենք պարտավոր հետևել այդ կարգերին և կանոններին, այդ թվում՝ և՛ պետական պաշտոնյաները, այդ թվում և՛ եկեղեցական այրերը»,-ասաց նա։
Հարցին՝ ի՞նչ կարգուկանոնի մասին է խոսքը, եթե տվյալ քահանան կարգալույծ է եղել, Թոմվասյանը պատասխանեց.
«Տվյալ քահանան այդ պարագայում այնտեղ իր պարտականություններն էր կատարում, մատուցեց բավականին հագեցած ծառայություն, որին մենք մասնակցեցինք և շնորհակալ ենք իրեն դրա համար։ Եթե իմ կարծիքն եք հարցնում, պատարագ է մատուցել համապատասխան սպասավոր, որին մենք մասնակցել ենք և կրկնում եմ՝ շնորհակալ ենք իրեն»։
Հարցին՝ այսինքն ինքն էլ չի հարգում Հայ Առաքելական եկեղեցու որոշումը, պաշտոնյան պատասխանեց՝ ինքը կիրակնօրյա բոլոր պատարագներին չի մասնակցում, սակայն բավականաչափ հաճախ այցելում է այն եկեղեցի, որի մերձակայքում բնակվում է։
Լրագրողները Սուրեն Թովմասյանից նաև հետաքրքրվեցինբ՝ եկող կիրակի և՞ս մասնակցելու է Հովհաննավանքում մատուցվելիք պատարագին, որին, ըստ նախնական հայտարարության, մասնակցելու է նաև Նիկոլ Փաշինյանը, պաշտոնյան պատասխանեց.
«Ես իմ կամքով, իմ ցանկությամբ մասնակցում եմ այն պատարագներին, որին որ ցանկանում եմ մասնակցել։ Չեմ կարող ասել, դեռ պլաններս մշակված չի, բայց հավանաբար կմասնակցեմ այդ պատարագին»։
Ինչ վերաբերում է վարչապետի հռչակած «Վեհարանը վեհին» նախաձեռնությանը, որով ցանկանում են Վեհարանից հեռացնել Գարեգին Բ կաթողիկոսին, Սուրեն Թովմասյանն ասաց.
«Ես կարծում եմ, որ Վեհարանը պետք է այն կարգավիճակում լինի, որ կարգուկանոնը և ամեն ինչը պահպանված լինեն՝ սահմանված ընթացակարգերին համաձայն»։
