Շատ հետաքրքիր է, որ դուք այդպես հարցն այսպես եք տալիս, ոչ թե ընդհանուր առմամբ ինչպես եմ վերաբերվում սուր արտահայտումներին կամ հայհոյանքներին կամ բռնությանը, լրագրողների հետ զրույցում ասաց առողջապահության նախարար Անահիտ Ավանեսյանը՝ պատասխանելով հարցին, թե ինչպես է վերաբերվում, երբ Ազգային ժողովի նիստերի ընթացքում Նիկոլ Փաշինյանը հրապարակավոչ կոռեկտ արտահայտություններ է անում և վիրավորում ընդդիմադիրներին:
«Ընդհանուր առմամբ, ես հայհոյանքներին շատ վատ եմ վերաբերվում, բռնությանը շատ վատ եմ վերաբերվում և կարծում եմ, որ ցանկացած իրավիճակում պետք է հնարավորինս մնանք հայհոյանքից և բռնությունից դուրս, այսքանը»,- ասաց նա:
Լրագրողները հետաքրքրվեցին, թե ինչպես է վերաբերվում երեկ ԱԺ նիստին Արսեն Թորոսյանի արած հրապարակային հայհոյանքներին, ինչին ի պատասխան Ավանեսյանը կրկին ասաց, որ վատ է վերաբերվում ցանկացած հայհոյանքի:
Հարցին՝ Թրոսյանին ասացի՞ք՝ մի հայհոյի, նա ասաց. «Ես որևէ մեկին դաստիարակելու խնդիր չունեմ, և ես նորից կրկնում եմ, և արդեն հրապարակային ասացի՝ ցանկացած տիպի հայհոյանքի ես վատ եմ վերաբերվում»:
Ճշտող հարցին՝ ՔՊ-ի փակ նիստերի ժամանա՞կ էլ են նման հայհոյանքներ հնչում, Ավանեսյանն արձագանքեց. «Թույլ տվեք ուղղակի չանդրադառնալ հարցին, որովհետև նման հարցն անտեղի է, ո՛չ»:
