Հայաստանում տասնյակ արտադրամասեր, գիտատեխնոլոգիական հիմնարկներ են ստեղծվել, որոնք կարողանում են ռազմական արտադրանք մատակարարել։ Բարձր տեխնոլոգիաների ոլորտին ուշադրություն դարձնելիս կտեսնենք, որ 2018 թվականին շուրջ 10 հազար աշախատող կար, հիմա՝ շուրջ 50 հազար, այսինքն՝ ոլորտը հնգապատկվելո է՝ ՀՆԱ-ում 1,2 տոկոսից դառնալով 7 տոկոս։ Հայկական արտադրության ռազմական տեխնիկայի ցուցահանդեսի ժամանակ այսօր այս մասին հայտարարեց ԱԺ փոխնախագահ Հակոբ Արշակյանը։
«Հայաստանում սուպերհամակարգչային ոչ մի կենտրոն չկար. այսօր Հայաստանը թոփ տասնյակի մեջ է։ Գիտության ֆինասավորումn աճել է շուրջ 3 անգամ՝ 12 միլիարդից դառնալով մոտ 36 միլիարդ։ Սա ապագայի հանդեպ մեր հավատն է։
Հայաստանի տեխնոլոգիական և ռազմարդյունաբերական ապագան հստակ է և պայծառ։ Այսօր ապրում ենք ապագայում, որը շատ տպավորիչ է»,- ասաց Հակոբ Արշակյանը։
Լրագրողները հետաքրքրվեցին՝ արդյոք ներկայացված ռազմական տեխնիկա փորձաքննություն անցել է։ ԱԺ փոխնախագահը պատասխանեց՝ ցուցանմուշների մեծ մասն արդեն իսկ մատակարարվում է բանակին, իսկ առանց փորձաքննության նման բան հնարավոր չէ։
«Բանակի ձեռքբերումները 2018-ի նկատմամբ տասնյակ, նույնիսկ հարյուրավոր անգամներով ավելի են։ Հարյուր միլիոնավոր դոլարների պայմանագրեր կան։ Զորահանդեսին ցուցադրված զինտեխնիկան բանակի տեխնիկան է»,- ասաց նա։
