Այն դիրքորոշումները, այն մոտեցումները, որոնք ունեցել է Բագրատ Սրբազանը, դրանք արտացոլված են եղել նաև Գերագույն հոգևոր խորհրդի հայտարարություններում: Այս մասին այսօր կայացած մամուլի ասուլիսի ժամանակ ասաց Գերաշնորհ Տեր Արշակ արքեպիսկոպոս Խաչատրյանը:
«Ինչ-որ մի պահից սկսած՝ Բագրատ Սրբազանը ներգրավվեց այնպիսի պրոցեսի մեջ, որը ենթադրում էր քաղաքական գործիքակազմերի օգտագործում: Եկեղեցին ինստիտուցիոնալ առումով քաղաքական գործիքակազմեր չի կիրառում, իշխանության հասնելու որևէ ձգտում, որևէ առաջնահերթություն չունի։ Եվ եթե հետևել եք մեր հայտարարություններին, մենք արձանագրել ենք՝ հաշվի առնելով, որ քաղաքական գործունեությունն անհամատեղելի է հոգևոր ծառայության հետ՝ այդ իսկ պատճառով ընթացք է տրվել Բագրատ Սրբազանի խնդրանքին՝ առժամանակ դադարեցնելու, կասեցնելու իր հոգևոր ծառայությունը։
Այսինքն՝ այդ պահից սկսած՝ Բագրատ Սրբազանը գործել է իր հոգևոր ծառայության կասեցման պայմաններում»,-նշեց բանախոսը:
Արշակ Սրբազանը նաև շեշտեց, որ նման պրակտիկա, իրավիճակ չի եղել, երբ հոգևորականը, տարբեր կուսակցությունների միահամուռ ցանկությամբ, առաջադրված լինի վարչապետի թեկնածու։
«Ինքս խոսել եմ Բագրատ Սրբազանի հետ և համոզված եմ, որ վարչապետի թեկնածու դառնալը նրա լավագույն երազների ոլորտից չէր։ Ստեղծվել է իրավիճակ, երբ ինքը հարկադրված էր ընդունել այդ առաջարկը, քանի որ համախմբումն առաջացել էր իր անձի շուրջը: Այդ իրավիճակում մեր կողմից գտնված միակ լուծումն այն էր, որ պետք է առժամանակ կասեցվեր, սառեցվեր իր հոգևոր ծառայությունը, որ հնարավորություն ունենար շարունակել: Ընտրությունն իրենն է:
Բնականաբար, եթե հոգևոր ծառայությունը կասեցվում է արժանապես, այս որոշման մեջ արտացոլված է նաև Եկեղեցու ամբողջական կեցվածքը»,- ընդգծեց Արշակ արքեպիսկոպոս Խաչատրյանը:
