ՀՆԱ միջինում տարեկան առնվազն 6 տոկոսի աճ ենք կանխատեսում, ՔՊ նախընտրական ծրագրի 3-րդ մասը ներկայացնելիս հայտարարեց ՀՀ վարչապետ Նիկոլ Փաշինյանը։
«Մեր հաջորդ կետն արդյունաբերական արտադրանքի թողարկման ծավալների՝ 50 տոկոս ավելացումն է։ Մենք արդյունաբերությանը պետք է աջակցենք ամենատարբեր ծրագրերով։
Հաջորդը ՀՆԱ-ում ՓՄՁ-ների մասնաբաժնի աճն է մինչև 40 տոկոս։ Մենք արդիականացման իմաստով լինելու ենք փոքր և միջին ձեռնարկությունների կողքին։ Մյուս կետը վերաբերում է տարեկան առնվազն 25 հազար նոր աշխատատեղերի ստեղծմանը, աղքատության կրճատմանը 5 տոկոսային կետով։
Մյուս կետն առողջության համընդհանուր ապահովագրության համակարգում ամբողջ բնակչության ընդգրկումն է։ Մենք պլանավորում ենք, որ 2028 թվին մեր ամբողջ բնակչությունը ներգրավված կլինի այդ համակարգում։
Հաջորդ կետը՝ կենսաթոշակների ինդեքսավորում այնպես, որ միջին թոշակը ցածր չլինի նվազագույն սպառողական զամբյուղից։ Մեր մոտ միջին կենսաթոշակը գերազանցում է սպառողական զամբյուղը, և սա պատմական նորություն է Հայաստանում սոցիալական ապահովության բնագավառում։ Մենք նախորդիվ նվազագույն թոշակը համապատասխանեցրեցինք նվազագույն պարենային զամբյուղին, որը նշանակում է, որ այդ գումարով պետք է թոշակառուն իր՝ մեկ ամսվա մինիմալ անհրաժեշտ կալորիաները կարողանա ապահովվել»,- ասաց Նիկոլ Փաշինյանը։
Նա միաժամանակ անդրադարձավ իր այն աղմկահարույց հայտարարությանը, որ թոշակառուներն իրենց ավելացված թոշակով կարող են Լառնակայի տոմս գնել։
«Դա բուռն քննարկումների տեղիք է տվել։ Վերջին շրջանում, երբ մենք այցելում ենք մարզեր, բազմաթիվ թոշակառուներ ասում են, որ իրենք նախկինում 30-40 հազար դրամ ծախսում էին դեղերի վրա, իսկ հիմա առողջության ապահովագրության առկայության պայմաններում այդ գումարները մնում են իրենց գրպանում։
Ապրիլի 1-ից 10 հազար դրամով ավելացել է կենսաթոշակը, կա նաև հետվճարի հնարավորություն՝ երբեմն 5 հազար, երբեմն 7 հազար, երբեմն 10 հազար դրամ։ Այսինքն՝ 20 հազար դրամով ակնհայտորեն կարելի է ձեռք բերել 3-10 եվրո արժողությամբ տոմս դեպի Լառնակա, և նախկինում դեղերի վրա ծախսված գումարները կարելի է ծախսել օրապահիկի և այլ ծախսերի վրա։
Ես ամենայն լրջությամբ ուզում եմ կոչ անել մեր թոշակառուներին, որպեսզի չուզողներին հակառակ՝ այդ դեղերի գումարները մի կողմ դնեն և առաջիկա ամռան ընթացքում սկսեն ճամփորդել, որովհետև ես կարծում եմ, որ ինչպես աշխարհի շատ երկրների թոշակառուներն են վարվում, մեր թոշակառուներն էլ արդեն շատ քիչ, շատ համեստ ծավալներով կարող են սկսել ճամփորդել։
Հայաստանում այսօր այս տրամաբանության մեջ գտնվող 150 հազար մարդ կա, և այդ խմբի թոշակառուներին կոչ եմ անում անպայման մտածել այս մասին»,- ասաց Փաշինյանը։
