2023 թվականի հունվարից նոր պարեկային ծառայություն կներդվի նաեւ Գեղարքունիքի, Կոտայքի, Տավուշի եւ Արագածոտնի մարզերում: Գործադիրը որոշել է պարեկների համար մեքենաներ գնել «Տոյոտա Երեւան» ընկերությունից՝ առանց մրցույթի: 175 մեքենայի դիմաց ընկերությանը կվճարեն 3.1 մլրդ դրամ: Որոշումը գործադրի՝ հուլիսի 21-ի նիստին հաստատեցին:
Փաշինյանը նշեց, որ այս հարցը կարող էր եւ չզեկուցվել, բայց քանի որ զգայուն ձեւակերպումներ կան, քննարկում են: Ու դա ավելի շուտ նմանվեց արդարացման. երկար բացատրեցին՝ ինչու՞ են գնումը կատարում մեկ անձից՝ առանց մրցույթի, եւ ինչու՞ հենց «Տոյոտա Երեւան»-ից, որոնց բաժնետերերին, ի դեպ, («Տոյոտա Երեւանի» 60 %-ի բաժնետերը «Հ2» հեռուստաընկերության համասեփականատեր Սամվել Մայրապետյանն է, 30 %-ինը՝ ՀՀ երկրորդ նախագահ Ռոբերտ Քոչարյանի որդի Սեդրակ Քոչարյանը) Փաշինյանը համարում է նախկին, թալանչի եւ ամենատարբեր լծակներով պայքարում նրանց դեմ:
ՀՀ ոստիկանապետ Վահե Ղազարյանը տեղեկացրեց, որ հունիսին մրցույթ են հայտարարել, մասնակից չի եղել: Հետո հայտնի ապրանքանիշերի հայաստանյան բոլոր պաշտոնական ներկայացուցիչներին հարցում են ուղարկել եւ պարզել, որ հայտարարված տեխնիկական բնութագրով, նշված քանակով ու նախատեսված ժամկետում ՝ մինչեւ նոյեմբերի 15-ը, մեքենաները մատակարարելու պարտավորություն կարող է ստանձնել միայն «Տոյոտա Երևան»-ը՝ գումարն ամբողջությամբ կանխավճարային եղանակով հատկացնելու դեպքում: Մյուս ընկերությունները հրաժարվել են:
«Երբ Շիրակի եւ Լոռու մարզերում եւս մեծ խմբաքանակով մեքենա ձեռք բերվեց, որոշակի հրապարակումներ եղան, թե ինչու է գումար ծախսվել եւ վեց բարձրախոսով մեքենա գնվել, կարող էր երկուսը լինել, չորսը, մեկը,- պատմեց Փաշինյանը,- ես հարկ եմ համարել, որպեսզի ոստիկանության բարեփոխումների խորհրդում այս հարցերը մանրամասն քննարկվեն: Դինամիկների հարցին մենք երեւի մի 45 րոպե տրամադրել ենք: Ինձ համար էլ էր կարեւոր, կարծում եմ ՝ բոլորի համար է կարեւոր»,- ասաց Փաշինյանը:
Պարզվեց՝ մեքենաների գույնն էլ պակաս կարեւոր չէր: Սպիտակը, թե՞ սեւն է լավը. սկզբում բաց գույնին էին կողմ, հիմա էլ մտածում են ՝ հենց մուգն է իրենց դուր գալիս…
Ու մեքենաների սեւ-սպիտակի երկարաշաունչ քննարկումը մի երկրի կառավարության նիստերի դահլիճում էր, որի զինվորները կանաչ անտառի մեջ սպիտակ վրանի ու թշնամու ուղիղ նշանառության տակ իրականացնում են մարտական ծառայություն ու սպանվում են…
Բայց այդ հարցն այս դահլիճում այդպես էլ չքննարկվեց ՝ թեկուզ մի 45 վայրկյան…
