Փաշինյանի հարձակումն Ամենայն հայոց կաթողիկոսի վրա հարձակում է Էջմիածնի և յուրաքանչյուր հայի վրա՝ թե՛ հայրենիքում, թե՛ Սփյուռքում

Բադեն Վյուրթեմբերգի հոգեւոր հովիվ Տիրատուր քահանա Սարդարյանը «Ազգ»-ի միջոցով կոչ անում համայն հայությանը.

Սիրելի՛ քույրեր և եղբայրներ,

երբ հուլիսի 20-ինպատրաստվում էինք աստվածային սուրբ պատարագի, վարչապետ Նիկոլ Փաշինյանը կրկին անցավ հանդուրժելիի սահմանները։ Հավատացյալ քրիստոնյան նման բան չէր անի։ Ֆեյսբուքում արված գրառմամբ, դիտավորյալ տեղադրված պատարագի սկզբում և ավարտից հետո, նա սպառնում է հեռացնել Ամենայն հայոց կաթողիկոս Գարեգին Երկրորդին և «ազատել» Էջմիածնի Սուրբ աթոռը, ինչպես գրում է, ինչը պետք է հասկանալ որպես «պղծել»։ Այս խոսքերը պարզապես վիրավորանք չեն, դրանք կանխամտածված սադրանք են, որի նպատակն է պառակտել մեր ժողովրդին և հրահրել անկարգություններ։

Որպես առաքելական մեր եկեղեցու հոգևորական՝ բարձրացնում եմ իմ ձայնը. սա բացահայտ հարձակում է մեր Սահմանադրության, մեր ինքնության և մեր միասնության վրա։ Հետևաբար՝ ձեռքերդ հեռո՛ւ մեր սրբություններից։

Հայաստանի Հանրապետության սահմանադրությունն այս հարցում հստակ է։ Հոդված 18-ի առաջին կետը ճանաչում է «Հայ Առաքելական Սուրբ Եկեղեցու բացառիկ առաքելությունը» և երաշխավորում  նրա անկախությունը պետությունից։ Հոդված 9-ը պաշտպանում է կրոնական ազատությունը և արգելում պետական միջամտությունը եկեղեցական գործերին։ Փաշինյանի՝ կաթողիկոսին հեռացնելու սպառնալիքը, որ համեմատել է Սերժ Սարգսյանի հեռացման հետ, ուղղակի խախտում է այդ սկզբունքները։ Սուրբ Էջմիածնի աթոռը քաղաքական կուսակցություն չէ, այլ՝ Հայաստանի հոգևոր սիրտը, որն ընտրվում է եկեղեցու կողմից, ոչ թե կառավարության։ Նման քայլը ոչ միայն հակասահմանադրական կլիներ, այլ նաև կխախտեր միջազգային իրավական նորմերը, այդ թվում՝ Մարդու իրավունքների համընդհանուր հռչակագրի 18-րդ հոդվածը և Մարդու իրավունքների եվրոպական կոնվենցիայի 9-րդ հոդվածը, որոնք պաշտպանում են կրոնական ազատությունը և կրոնական հաստատությունների ինքնավարությունը։

Փաշինյանի գործողությունները վտանգում են ոչ միայն Եկեղեցին, այլ նաև մեր ժողովրդավարության հիմքերը։ Պետությունը, որը խախտում է իր սահմանադրությունը, հանգում է կամայականության։

Ժամանակի ընտրությունը պատահական չէ։ Փաշինյանը օգտագործեց Կիրակին եւ այն պահը, երբ հայ հոգեւորականները պատրաստվում էին պատարագի, այսինքն խախտեց պահի սրբությունը՝ սադրելու և պառակտում սերմանելու համար։ Նրա խոսքերը քաղաքականություն չեն, այլ՝ գրգռիչ կոչեր։ Դրանք նպատակ ունեն պառակտելու հավատացյալներին և հրահրելու անկարգություններ՝ շեղելու հանրության ուշադրությունը իր կառավարության քաղաքական ձախողումներից։ Նման մարտավարությունը պետական գործչի վարքագիծ չէ, այլ՝ մարդու, որ կորցրել է ինքնատիրապետումը։ Փաշինյանի հարձակումն Ամենայն հայոց կաթողիկոսի վրա հարձակում է Էջմիածնի և յուրաքանչյուր հայի վրա՝ թե՛ հայրենիքում, թե՛ Սփյուռքում։ Վերջին շաբաթների ընթացքում բազմիցս զգուշացրել եմ այս ճգնաժամի մասին։ Հիմա ժամանակն է վճռականորեն գործելու։

Ես կոչ եմ անում․ • Իրավական հետևանքներ. Հայաստանի Սահմանադրական դատարանը պետք է քննի Փաշինյանի սպառնալիքները։ Իրավաբանները և քաղաքացիները պետք է հայցեր ներկայացնեն Սահմանադրությունը պաշտպանելու համար։

 • Խաղաղ դիմադրություն. Բարձրացրեք ձեր ձայնը՝ աղոթքներում, խաղաղ ցույցերում, պատգամավորներին և միջազգային կազմակերպություններին ուղղված նամակներում։ Եկեք ցույց տանք, որ հայ ժողովուրդը չի լռում, երբ հարձակում են գործում նրա հոգու վրա։

• Միջազգային աջակցություն. Սփյուռքն ու միջազգային հանրությունը՝ ՄԱԿ-ից մինչև Եվրոպայի խորհուրդ, պետք է դատապարտեն այս հարձակումը կրոնական ազատության դեմ։ Հայաստանը փակ երկիր չէ, աշխարհը հետևում է։ Փաշինյանը գուցե կարծում է, թե այս սպառնալիքներով ուժ է ցուցադրում։ Բայց իրական ուժը օրենքի և հավատի հանդեպ հարգանքի մեջ է։

Ժողովուրդը, որը կորցնում է իր Եկեղեցին, կորցնում է իր հոգին։ Պետությունը, որը խախտում է իր Սահմանադրությունը, կորցնում է իր օրինականությունը։

Սիրելի՛ համայնք, մնացեք ամուր։ Աղոթեք մեր Եկեղեցու, մեր Կաթողիկոսի և մեր ժողովրդի միասնության համար։ Եկեք խոսենք մեկ ձայնով․ Էջմիածինը անխախտելի է։ Մեր սահմանադրությունն անխախտելի է։ Մեր հավատն անխախտելի է։

ՏԻՐԱՏՈՒՐ քահանա ՍԱՐԴԱՐՅԱՆ

Բադեն Վյուրթեմբերգի հոգեւոր հովիվ

հատուկ «Ազգի» համար