Երկու տարուց ավելի է՝ տառապում ենք, թոռս ոչ թե անհետ կորած է, այլ՝ գերի. վստահեցնում է ժամկետային զինծառայող Սարգիս Ղուկասյանի տատիկը:
«Երբ ինքը շրջափակման մեջ է եղել Հադրութում, հատուկջոկատայինները շրջափակել են, այնտեղ բոլոր զոհերին հետ են տվել, բայց մինչև հիմա իմ թոռնիկից ոչ մի ԴՆԹ-ի համընկնում չկա։ Իր ընկերոջն օգնելու ժամանակ իրենց հայտնաբերել են թուրքերը, ընկերոջը սպանել են, ինքն ուզեցել է փախչի՝ կամ վիրավորվել է, կա՛մ գերի է»,-ասաց Սարգիս Ղուկասյանի տատիկը։
Ղուկասյանները 2020 թ.-ի հոկտեմբերի 10-ից տեղեկություն չունեն զինծառայողից, երբ պատերազմը սկսվել է, տղային Ջաբրայիլից տեղափոխել են Հադրութ։ Սարգիս Ղուկասյանի հայրը տղայի հետևից գնացել է Ջաբրայիլ, բայց որդուն չի տեսել։ Հայրը զոհվել է։
«Տունս ավիրվեց, մի տնից երկու չափահաս տղամարդ չկա։ Մեկին հուղարկավորել ենք, մյուսի ճակատագրից էլ տեղյակ չենք։ Իբր ապրում ենք․․․մեր իշխանությունից ի՞նչ սպասեմ, ոչ մի բան էլ չեն արել։ Ինձ ասել են, որ տղայիս գլուխն էլ են կտրել, եւ մեր ղեկավարությունը սա իմացած ծնողիս վախեցնում է, թե քրեական պատասխանատվության կենթարկեն։ Ինձ համացանցում ինչ ասես ասում են, բայց ես սուտ չեմ խոսում։ Մենք ամեն օր տառապում ենք։ Հարսիս ամուսինը զոհված է, տղան՝ անհետ կորած»,- ասաց կինը։
Սարգիս Ղուկասյանի տատիկի խոսքով՝ իշխանությունների հետ բազմիցս հանդիպումներ է ունեցել, սակայն ոչ մի ակնկալիք չունի, քանի որ գործող իշխանությունը մինչև հիմա ոչ մի ռեալ քայլ չի արել այս ուղղությամբ։
«Թոռս առաջին օրվանից պատերազմի մեջ էր, իրենք խաբել-ասել էին՝ բունկերներում ապահով տեղում է… խաբեությունն ամեն տեղ է, մեզ մոլորության մեջ գցեցին»,-նշեց տատիկը։
Նշենք, որ անհետ կորած եւ գերեվարված զինծառայողների ընտանիքի անդամներն այսօր Ազատության հրապարակից երթով շարժվեցին դեպի Կառավարություն՝ բարձրաձայնելու, որ իրենց որդիների ճակատագիրը մինչ օրս հայտնի չէ, որ գերիները դեռ չեն վերադարձվել, որ նոյեմբերի 9-ի եռակողմ հայտարարությամբ ամրագրված կետերը չեն կատարվում: Նաև պաստառներ տեղադրվեցին Հանրապետության հրապարակում՝ նախատոնական ձևավորումների ֆոնին։
Ավելին՝ տեսանյութում
