Կոռուպցիա-բացահայտում-ծեծ-գավառական ֆաշիզմ- խուլիգանության պարտակում. ինչու՞ է Նիկոլ Փաշինյանը վախենում Արամ Սարգսյանից:
«Մայր Հայաստան» դաշինքի ղեկավար Անդրանիկ Թևանյանը վերլուծել է այս օրերին ակնառու դարձած քաղաքական այն առևտուրը, որի հետևանքով մարդ ծեծած թաղապետն ազատության մեջ է, ավելին՝ նրա կուսակցության ղեկավարը պաշտպանում ու աջակցում է բռնություն գործադրողին։
Ստացվում է՝ Նոր Նորքի թիվ 105 մանկապարտեզի վերանորոգման ընթացքում երևանցիների հարկերը մսխելու, թալանելու դեպքը բացահայտողներին մեղադրանք է առաջադրվում, նրանցից մեկին՝ ակտիվիստ Արթուր Չախոյանին, պետական հաստատությունում՝ Նոր Նորքի թաղապետարանում, տեսախցիկների առաջ ծեծում են, բայց խուլիգանության հատկանիշներով բերման է ենթարկվում ծեծվողը, ոչ թե ծեծողն ու ծեծողները։
Իսկ ծեծողը հանգիստ ու անպատիժ ասում է՝ սոված եմ, գնում եմ հաց ուտելու։
Ծեծողը թաղապետ Տիգրան Տեր-Մարգարյանն է, որին հաջորդ իսկ օրը պաշտպանեց «Հանրապետություն» կուսակցության ղեկավար Արամ Զավենի Սարգսյանը։
Անդրանիկ Թևանյանը բացահայտում է այն քաղաքական առևտուրը, որն առաջացել է ընտրություններում 9 տոկոս ձայն հավաքած Տիգարն Ավինյանին քաղաքապետի աթոռին նստեցնելու՝ Քպ-«Հանրապետություն» կոալիցիայի հետևանքով։
Եթե Տիգրան Տեր-Մարգարյանը հեռացվի, մենք վայր կդնենք մեր լիազորությունները. հայտարարել է Մալաթիա-Սեբաստիայի թաղապետը։ Սա, բոլորս ենք հասկանում, որ թաղապետի հայտարարությունը չէ, այլ «Հանրապետություն» կուսակցության վերջնագիրը՝ Քպ-ին։
Արամ Սարգսյանը բացահայտ կերպով ձեռնոց է նետել Նիկոլ Փաշինյանին՝ մենք ենք ձեր թեկնածու Ավինյանին քաղաքապետ դարձրել, ուրեմն դուք չեք կարող մեր կուսակցության ներկայացուցիչ թաղապետին պատժել կամ պաշտոնից հեռացնել։ Հակառակ դեպքում՝ «Հանրապետությունը» մանդատները վայր կդնի, Երևանի ավագանիում կառաջանա քաղաքական ճգնաժամ, որին կհետևեն արտահերթ ընտրություններ, իսկ Գյումրու, Փարաքարի կամ հենց թեկուզ 2023 թվականի Երևանի ընտրություններով ՔՊ-ն հրաշալի պատկերացնում է, որ ձայն չի հավաքելու ու կորցնելու է իշխանությունը։
