«Վասն հայրենյաց» ազգային համախմբման շարժման ներկայացուցիչներն արդեն Շիրակի մարզում են ու սահմանամերձ Անիպեմզա գյուղում 12 մետր բարձրությամբ ձողի վրա 6 մ․ երկարությամբ, 3 մ․ լայնությամբ Եռագույնը տեղադրելու նախապատրաստական աշխատանքներ են կատարում։
Azg.am-ը կապ հաստատեց Անիպեմզայում գտնվող Սևակ Հակոբյանի հետ, որը «Վասն հայրենյաց»-ի համահիմնադիրն է և Լիբանանի «Զարթոնք» թերթի գլխավոր խմբագիրը։
Նա պատմեց, որ առաջին Եռագույնը որոշվել է տեղադրել Անիպեմզայում, երկրորդը կտեղադրվի Գեղարքունիքի մարզի սահմանամերձ Արտանիշ գյուղում, և այդպես 2-3 շաբաթը մեկ, 9 սահմանամերձ մարզերում՝ առավել տեսանելի վայրերում, կտեղադրվի Հայաստանի Հանրապետության պետական խորհրդանիշ Եռագույնը։
Նախաձեռնության նպատակն է Հայաստանի Հանրապետության անձեռնմխելի սահմանները խորհրդանշորեն ուրվագծել իր պետական դրոշով, նաև հանրության շրջանում առավել մեծ պատկառանք սերմանել պետական խորհրդանիշերի նկատմամբ, ուշադրության կենտրոնում պահել սահմանամերձ գյուղերը, որոնց մի մասն այսօր հայտնվել է հայ-ադրբեջանական շփման գծում։
«Վասն հայրենյացը» հույս ունի, որ Հայաստանի, Արցախի, Սփյուռքի հայերը կոգևորվեն ու մասնակից կլինեն այս նախաձեռնությանը, կհամախմբվեն, բռունցք կդառնան։
Արտանիշից հետո Եռագույնը Լոռու մարզի սահմանամերձ Ջիլիզա գյուղում է տեղադրվելու։ Ժամանակի ընթացքում կորոշվի, թե որն է լինելու 4-րդը, բանակցություններ կսկսվեն այդ ուղղությամբ, որովհետև Եռագույնի տեղադրման հեղինակներին ընկալում են որպես ընդդիմադիրներ, ու հարց է՝ արդյո՞ք սահմանամերձ 9 մարզերից բոլորի մարզպետերն ու գյուղապետերը կկանգնեն այս նախաձեռնության կողքին։
Անիպեմզայում մարտի 5-ին՝ ժամը 14։00-ին, Եռագույնը կտեղադրվի Երերույքի խոնարհված տաճարի հարևանությամբ։ Տարածքի լուսավորության հարցն արդեն լուծված է։ Ի դեպ, «Վասն հայրենյացը» պարբերաբար այցելելու է սահմանամերձ գյուղեր, հետևելու է, որպեսզի դրոշը միշտ տեղում լինի․ մաշվելու դեպքում փոխելու է, տարածքն էլ պետք է երեկոյան լուսավորված լինի։
«Անիպեմզայի գյուղապետի հետ արդեն պայմանավորվել ենք։ Գիտե՞ք, խանգարողներ էլ են լինում։ Շատ զարմանալի կլինի, եթե մյուս 8 մարզերի ղեկավարները կամ գյուղապետերը չհամաձայնեն Եռագույն տեղադրել։ Մենք պահպանում ենք Պետական դրոշի նկատմամբ օրենքով սահմանված բոլոր կանոնները, տարածքներն էլ համայնքին են պատկանում, ոչ թե ինչ-որ մեկի սեփականությունն են։ Ինչո՞ւ պետք է որևէ մեկը դեմ լինի իր երկրում իր դրոշը տեղադրելուն։ Եթե կընդդիմանան, կուզեն հանել այն, թող հանեն, կգնանք, երկրորդը կտեղադրենք կամ սահմանամերձ մեկ այլ գյուղ կտեղափոխենք։ Նախաձեռնության մասին արդեն ասում են՝ ընդդիմադիրներն են դրոշը տեղադրում։ Բայց Եռագույնը ընդդիմության կամ իշխանության սեփականությունը չէ, այն բոլորինս է, մեր պետությանն ու ժողովրդինն է։
Առաջին Եռագույնը տեղադրենք, տեսնենք՝ ինչպիսի արձագանք կլինի, հետագայում պարզ կլինի՝ ընդդիմացողներ կա՞ն, թե ոչ»,- Azg.am-ի հետ զրույցում ասաց Սևակ Հակոբյանը։
Մարտի 5-ին, Անիպեմզայում առաջին Եռագույնի տեղադրմանը կմասնակցի նաև ՀՀ վաստակավոր արտիստուհի Շուշան Պետրոսյանը։
Ի դեպ, մարտի 5-ը Սպարապետ Վազգեն Սարգսյանի ծննդյան օրն է, որը խորհրդանշաբար համընկել է «Վասն հայրենյաց» ազգային համախմբման շարժմաան անդրանիկ նախաձեռնության հետ։
