«Կոնկրետ ի՞նչ քայլեր են ձեռնարկվում, ի՞նչ աշխատանք է արվում. սա ճիշտ չէ, այսպիսի հարցեր տալը ճիշտ չէ։ Այն, որ աշխատանքներ տարվում են, միանշանակ է։ Ռուս խաղաղապահները ամենաշահագրգռված կողմն են, որ ճանապարհը բացվի, չէ՞ որ իմիջային հարվածներն առաջինն իրենց վրա են։ Աննորմալ,անառողջ քննարկումների մեջ մտնելուց հոգնել ենք, հերիք է»,- ՄԱԿ-ի գրասենյակի մոտ լրագրողների հետ ճեպազրույցում վրդովված ասաց Արցախի ԱԳ նախարարի ժամանակավոր պաշտոնակատար Դավիթ Բաբայանը։
Ո՞վ է իրավիճակի պատասխանատուն. այս հարցից արցախցի պաշտոնյան ավելի վրդովվեց։ Դավիթ Բաբայանն ասաց. «Այդ հարցի՞ց ահաբեկվեմ, թե ստեղծված իրավիճակից։
Ադրբեջանն ու Թուրքիան են պատասխանատուն, էլ ո՞վ»։
Ադրբեջանցիների թշնամական հերթական քայլը Դավիթ Բաբայանն այսպես մեկնաբանեց. «Ադրբեջանցիներն ուզում են խեղդել Արցախը։ Սկսում են Կաշենից, ուզում են, որ հանքը փակվի, իսկ այն մեր ամենամեծ գործարանն է՝ բյուջեի եկամուտներն ապահովող, գումարած այն, որ 1800 մարդ է աշխատում։ Ուզում են կաթվածահար անել տնտեսությունը։
Պետք է Ադրբեջանի վրա ճնշում լինի, բայց այդ ճնշումը չենք տեսնում։ Ադրբեջանը ապտակում է նաև միջազգային հանրությանը»։
