«Ադրբեջանցիներին չեն հետաքրքրում հանքավայրերը, դրանք ճիշտ կամ սխալ օգտագործելը։ Նրանք նպատակ ունեն հպատակեցնել Արցախն ու արցախցուն, բայց դա նրանց չի հաջողվելու։ Պատմության ընթացքւմ արցախցիները դրսևորել են բացառիկ կամք՝ դիմակայելով արհավիրքներին ու դժվարություններին։ Այս անգամ էլ են դիմակայելու, ուղղակի թե ինչ գին ենք վճարելու, դա է հարցական։ Ամեն ինչ կախված է Արցախի կառավարիչներից, ինչպես կկարողանան կազմակերպել այդ մարդկանց դժվարությունների հաղթահարման ուղին։ Ակնհայտ է, որ որևէ հույս Հայաստանի իշխանությունների նկատմամբ չի կարող լինել»,-ընդդիմության կազմակերպած ցույցի ժամանակ լրագրողների հետ զրույցում ասաց ՀՀ Երրորդ նախագահ Սերժ Սարգսյանը։
Հատկապես իշխանությունների կողմից գնդակն անընդհատ գցվում է ռուս խաղաղապահների դաշտ, թե նրանք չեն կարողանում իրենց պարտավորությունները կատարել ու բացել Լաչինի միջանցքի՝ Արցախը Հայաստանին կամող ճանապարհը։
Այս կապակցությամբ Սերժ Սարգսյանը նկատեց. «Որևէ մեկը չի կարող մեր փոխարեն կռվել, մեր փոխարեն չի կարող բարդ խնդիրներ լուծել, մենք ունենք դաշնակիցներ ու բարեկամներ, բայց նրանք կարող են իրենց պայմանագրային պարտավորությունները կատարել, եթե մենք գործենք, ուրիշը ինչո՞ւ պիտի գա մեր փոխարեն անի»։
Երրորդ նախագահի համոզմամբ՝ Հայաստանի կառավարիչները չեն կարող լուծել Արցախի ճակատագիրը, նրանք ուղղակի ձեռքները լվացել են, հրաժարվել են պաշտպանել արցախցիներին։
«Մենք վկա ենք այնպիսի իրավիճակի, երբ որոշումները կայացվում են օրվա խնդիրներից ելնելով։
Հայաստանի կառավարիչները, որոնց դուք իշխանություն ենք անվանում, կարո՞ղ են մեզ ցույց տալ՝ որոնք են խաղաղապահների պարտավորությունները։ Նոյեմբերի 9-ի փաստաթղթում ինչ գրված է, նրանք դա էլ կատարում են։ Պետք չէ սեփական պրոբլեմները բարդել ուրիշի վրա։ 4-5 տարի առաջ մեղադրում էին նախկիններին, հիմա էլ՝ ռուս խաղաղապահների՞ն։ Այո, բոլորիս սպասելիքներն էլ ավելի շատ են Ռուսաստանից, բայց ցանկացած սպասելիք կարելի է կողքից փչացնել, ինչպես փչացրեցին։ Ինչպե՞ս կարելի է ծաղրել քո դաշնակցի բարձրագույն պաշտոնյային»,-ասաց Սերժ Սարգսյանը։
Դիմակայել, պայքարել. այլ ելք չունենք՝ կարծում է նախագահը։
«Պատերազմից հետո 2 տարի է անցել, Հայաստանի կառավարիչները չէ՞ին կարող վերականգնել բանակը։ Ճիշտ հակառակն են անում նրանք»,- ավարտեց Սերժ Սարգսյանը։
