…որ ադրբեջանցիները չպղծեն

Արցախի Մարտունի քաղաքում տեղադրված Մոնթե Մելքոնյանի արձանն արցախցիներն ապամոնտաժել են, որպեսզի ադրբեջանցիների ձեռքը չընկնի ու չպղծվի։

Մարտունեցիները դարձյալ իրենց Ավոյի հետ են, նրա արձանն իրենց հետ վերցրել են ու դուրս եկել Մարտունուց։

Ավոն ադրբեջանցիների ահուսարսափն էր, ու անգամ մահվանից հետո նրա անունը 30 տարի հանգիստ չի տալիս թշնամուն։

Ավոն ղեկավարեց Մարտունու ինքնապաշտպանությունը։ Մարտունին Ավոն է պահել ու փայփայել։ Նա ղեկավարել է նաև Քարվաճառի, Ակնայի ազատագրական պայքարը։

Ավոն անառիկ պահեց Մարտունին։ Մարտունիում, ամեն տան Ավոյի մեծադիր նկարն է փակցված։ Երբ հարցնեք մարտունեցիներին՝ քանի երեխա ունեք, կպատասխանեն Ավոս… ու կթվարկեն մյուս երեխաների անունները։

Ավոյի պահած, նրանով շնչող Մարտունին ադրբեջանցիների ձեռքում է, բայց նրա հուշարձանն ու Ավոն մերն են, միայն մերը։