ՖԻՖԱ-ի նախկին նախագահ Զեպպ Բլատտերը հայտարարել է, որ 2022թ․ Ֆուտբոլի Աշխարհի առաջնությունը Քաթարում անցկացնելու որոշումը սխալ էր։
86-ամյա Բլատերը ՖԻՖԱ-ի նախագահն էր 2010թ․, երբ Քաթարին շնորհվեց Առաջնությունն անցկացնելու իրավունքը։
Բլատերի հայտարարությունը հաջորդել է Քաթարում Ֆուտբոլի աշխարհի առաջնության դեսպան Խալիդ Սալմանի՝ գերմանական «ZDF» հեռուստաընկերությանը տված հարցազրույցին, որտեղ նա նույնասեռականությունը անվանել է «ուղեղի հիվանդություն»։ Երբ լրագրողը խոսել է Քաթարում նույնասեռականության՝ օրենքից դուրս լինելու մասին, Սալմանը պատասխանել է․ «Մեր երկիր այցելող ֆուտբոլի ԼԳԲՏՔ+ երկրպագուները պետք է ենթարկվեն մեր երկրի կանոններին։ Նույնասեռականությունը հարամ է, գիտե՞ք՝ ինչ է նշանակում «հարամ»։ Ես մոլի մահմեդական չեմ, բայց համարում եմ, որ նույնասեռականությունը ուղեղի հիվանդություն է»։ Այս արտահայտությունից անմիջապես հետո հեռարձակող հեռուստաընկերությունը դադարեցրել է հարցազրույցը։
Փաստն այն է, որ ԼԳԲՏՔ+ անձինք Քաթարում համարվում են օրենքից դուրս, նույնասեռական հարաբերությունները այստեղ պատժվում են օրենքով՝ բանտարկությունից մինչեւ մահապատիժ։
Բլատտերը խոսել է այն մասին, որ Քաթարը «չափից դուրս փոքր երկիր է Աշխարհի առաջնություն անցկացնելու համար»։
Շվեցարական Tages Anzeiger թերթին տված հարցազրույցում նա մասնավորապես ասել է․ «Ֆուտբոլը եւ Աշխարհի առաջնությունը չափազանց խոշոր իրադարձություններ են այդ երկրի համար»։
Նոյեմբերի 20-ից դեկտեմբերի 18-ը Քաթարում անցկացվելիք առաջնությունը Ֆուտբոլի Աշխարհի առաջնությունների 92-ամյա պատմության ողջ ընթացքում առաջինն է, որ անցկացվելու է Մերձավոր Արեւելքում։
12 տարի առաջ առաջնությունն անցկացնելու իրավունքի համար Քաթարը ԱՄՆ-ին հաղթեց 14 ընդդեմ 8-ի ձայներով։ Բլատտերը հայտարարեց, որ ինքն անձամբ քվեարկել է ԱՄՆ-ի օգտին եւ մեղադրեց ՈՒԵՖԱ-ի այն ժամանակվա նախագահ Միշել Պլատինիին՝ ձայները հօգուտ Քաթարի կեղծելու մեջ։
«Դա շատ վատ ընտրություն էր,- ասել է Բլատտերը,- եւ ես, որպես այն ժամանակվա ՖԻՖԱ-ի նախագահ, ինձ պատասխանատու եմ համարում դրա համար։ Քաթարը փաստացի հաղթեց Պլատինիի եւ ՈՒԵՖԱ-ի թիմի չորս ձայների շնորհիվ։ Սա է իրականությունը,- մասնավորապես ասել է Բլատտերը։
Ի դեպ, Աշխարհի առաջնությունը Քաթարում անցկացնելու նախապատրաստական աշխատանքների ողջ ընթացքն ուղեկցվել է տարատեսակ սկանդալներով։ Սալմանի հարցազրույցից ավելի վաղ Քաթարի մշակույթի նախարարության ներկայացուցիչ Մարիամ Յասին Ալ-Համադին էր հայտարարել, որ ժամանող երկրպագուներից ակնկալում է հարգանք մահմեդական երկրի կանոնների, սովորույթների եւ օրենքների նկատմամբ։
Առանց աղմուկի չի անցնել նաեւ առաջնության համար մարզադաշտերի եւ կից շինությունների կառուցումը։ Դրանք վրա աշխատում էին հիմնականում Աֆրիկայից եւ Ասիայից ժամանած միգրանտներ, որոնց աշխատանքի պայմանները անտանելի էին։ 2021թ փետրվարին «Դը Գարդիանը» հաշվարկեց, որ նախապատրաստական աշխատանքների 10 տարվա ընթացքում Քաթարում մահացել է Հնդկաստանից, Պակիստանից, Շրի-Լանկայից, Նեպալից եւ Բանգլադեշից ժամանած մոտ 6500 միգրանտ։
Սալմանի հայտարարությունների առիթով արդեն բողոքել են իրավապաշտպան բազմաթիվ կազմակերպություններ, ինչից հետո Աշխարհի առաջնության կազմակերպիչները շտապել են հայտարարել, որ «ցանակացած ոք հրավիրված է այցելելու եւ վայելելու Աշխարհի առաջնության խաղերը, եւ որեւէ մեկն այստեղ խտրականության չի ենթարկվելու»։
Ռուզան Ազիզյան
