Հանրության շրջանում պարսավանքի մեծ ալիք է բարձրացել «ՀանդԱրտ»-ի «Ցանկապատ» ներկայացմանը Նիկոլ Փաշինյանին հրավիրելու փաստի առնչությամբ։
Մարդիկ զարմացած են՝ ինչո՞ւ են Փաշինյանին հրավիրել այդ բացօթյա ներկայացմանը, ի՞նչ նպատակով՝ ցույց տալու, որ սատարո՞ւմ են Հայաստանի ղեկավարի վարած քաղաքականությանը, որ համաձա՞յն են նրա քայլերի հետ։
Իսկ նա էլ գնաց ներկայացմանը, բոլորին քարշ տվեց իր դաշտ, բարոյապես փչացրեց, «գաղափարական» նկատողություններ արեց ու գնաց։
Ու ներկաներից ոչ ոք չփորձեց հակադարձել, որ մեր Հայրենիքը շատ ավելի մեծ է, քան այն տարածքն է, որն ինքն է մեզ մատուցում՝ որպես «ինքնիշխան պետություն»։
Ներկայացման գլխավոր հերոս Մկրտիչ Արզումանյանն էլ չհակադարձեց, ավելին՝ ժպտալով նրա հետ լուսանկարվեց։
Դրանից հետո սոցցանցերով սկսվեց պարսավանքի ալիքը նաև Մկրտիչ Արզումանյանի նկատմամբ։
Ի պաշտպանություն Մկոյի՝ հանդես է եկել քպ-ական պատգամավոր Վահագն Ալեքսանյանը՝ գրելով.
«Շնագայլերի ոհմակի տրամաբանությամբ հարձակման այսօրվա թիրախը Մկոն է՝ Մկրտիչ Արզումանյանը։
Օրահացի դիմաց ատելություն սփռողները որոշել են դերասանին փնովել, չեք հավատա՝ դեր խաղալու համար։
Շնագայլերի գործելաոճի տրամաբանությունը պարզ է՝ թիրախավորել, ատելություն տարածել բոլոր նրանց նկատմամբ, ովքեր գործակալական ցանցի թրի թակով չեն անցնում, ովքեր «մեթոդիչկայում» գրված նարատիվներից շեղվող անձնական կարծիք ունեն։
Բայց այս ողորմելիները, կամ ավելի շուտ այս ողորմելիների տերերը չեն հասկանում, որ մի անգամ նույն բանը արդեն փորձել են 2021-ին ու ձախողվել, երկրորդ անգամ փորձելուց միայն իրենք են ավելի մարգինալանալու (չնայած՝ էլ ու՞ր ավելի)։
Մկրտիչ Արզումանյան ջան, ես չգիտեմ քո քաղաքական հայացքները, չգիտեմ ու՞մ ես ընտրել կամ ու՞մ ես ընտրելու, բայց դու, ինչպես յուրաքանչյուր արտիստ ազատ ես քո գործն անելու ու դրա համար շնագայլերի ոհմակի հարձակման չենթարկվելու։ Հավատա, հիմա քեզ թիրախավորող մարդիկ վաղը պատրաստ կլինեն քեզ երգեր ու պոեմներ ձոնել, եթե շեֆերի տվածից երկու կոպեկ ավել տվող լինի»։
Ի դեպ,ակս գրառման մեկնաբանությունների դաշտում Մկոն գրել է՝ Վահագն Ալեքսանյան ջան, շնորհակալ եմ»։
