Հայաստանը դեռ չի հայտարարել Հավաքական անվտանգության պայմանագրի կազմակերպությունից (ՀԱՊԿ) դուրս գալու իր մտադրության մասին. լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։
Հիշեցնենք, որ այսօր Արտաքին հետախուզության ծառայության հրապարակած զեկույցում անդրադարձ կա նաև Հայաստանի՝ ՀԱՊԿ-ից դուրս գալու մտադրությանը։
«Քիչ հավանական ենք գնահատում, որ 2025 թվականին Հայաստանի կողմից ՀԱՊԿ անդամության սառեցման հիմքերը կվերանան, ինչը մեր գնահատմամբ նշանակում է, որ անվտանգային այս կառույցի հեղինակությունը կշարունակի մնալ էականորեն կասկածի տակ և հետևությունների աղբյուր մյուս անդամ պետությունների համար»,-ասված է զեկույցում։
«ՀԱՊԿ-ն անկախ, հասուն կազմակերպություն է, որն ապացուցել է իր արդյունավետությունն ու արդիականությունը, մինչ այժմ Հայաստանը չի հայտարարել այդ կազմակերպությունից դուրս գալու մտադրության մասին»,-ասել է Պեսկովը։
Կրեմլի ներկայացուցիչը նաև նշել է, որ ՌԴ նախագահ Վլադիմիր Պուտինը ՀՀ վարչապետ Նիկոլ Փաշինյանի հետ վերջին հեռախոսազրույցում չի քննարկել Հայաստանի աշխատանքը ՀԱՊԿ շրջանակներում։
