«Կլինիկական մահ» ախտորոշմամբ Արաբկիր ԲԿ է տեղափոխվել 1 տարեկան 2 ամսական երեխա։ Նա գտնվում է վերակենդանացման և ինտենսիվ թերապիայի բաժանմունքում` բժիշկների հսկողության տակ։ Նրա նկատմամբ բռնություն կիրառելու կասկածանքով մեկ անձ ձերբակալվել է։
ՆԳՆ Ոստիկանությունից հայտնեցին, որ քրեական ոստիկանության ծառայողները սպանության փորձի կասկածանքով ձերբակալել են մեկ անձի և ներկայացրել նախաքննական մարմին։
Ըստ լրատվամիջոցների ունեցած տեղեկությունների՝ երեխայի նկատմամբ բռնություն է կիրառել նրա խորթ մայրը։
Երեխայի նկատմամբ բռնություն կիրառելու դեպքի առթիվ ՀՀ քննչական կոմիտեի Երևան քաղաքի քննչական վարչությունում սպանության փորձի հատկանիշներով նախաձեռնվել է քրեական վարույթ:
ՀՀ Քննչական վարչությունից հայտնում են, որ Նախաքննության ընթացքում 1 անձ ձերբակալվել է:
Ավելի վաղ, shamshyan.com-ը գրել էր, որ այսօր՝ մարտի 16-ին, արտառոց դեպք է տեղի ունեցել Արարատի մարզում։ Կեսգիշերից անց «կլինիկական մահ» ախտորոշմամբ Երևանի «Արաբկիր» բժշկական կենտրոն է տեղափոխվել տղա երեխա։
Տեղում ոստիկանները պարզել են, որ երեխային հիվանդանոց են տեղափոխել Արարատի մարզից, ինչից հետո ոստիկանության Արաբկիրի բաժնից տեղեկությունը փոխանցել են ոստիկանության Մասիսի բաժին։
Արաբկիրի ոստիկանները պարզել են, որ հիվանդանոց տեղափոխվածը 1 տարեկան 2 ամսական Ալեքսան Մ.-ն է և ըստ օպերատիվ տեղեկությունների՝ երեխային ծեծի է ենթարկել ծնողներից մեկը։
