«Իսկ ինչու՞ դոմփել». մնացած մասով փաստորեն կոնսենսուս ունենք, որ սրբապիղծ «սրբազանների» հարցը պետք է լուծել. Փաշինյան

Փաշինյանը երկուշաբթի նոր գրառում է արել՝ մեկնաբանելով նախորդների արձագանքը։

Ըստ նրա՝ մարդիկ ավելի շատ վրդովվել են «դոմփել» բառից, քան «սրբապիղծ»-ից։

Իրականությունն այլ է. հանրային վրդովմունքի մեծալիք է բարձրացել նաև, որովհետև երկրի ղեկավարը հոգևորականներին անվանել է «սրբապիղծ», իսկ «դոմփել» բառը նողկանքի ալիք է առաջացրել։

Փաշինյանի այսօրվա գրառումը՝ ստորև.

Խորհրդային Միության ժամանակ մի անեկդոտ կար։ Կարմիր հրապարակում թռուցիկներ են գտնում, որոնց վրա գրված է․ «Քաղբյուրոյին գնդակահարել, Կրեմլի պատերը ներկել կանաչ»։ Հայկական ռադիոն արձագանքում է․ «Իսկ ինչու՞ կանաչ»։

Հիմա որքան հասկանում եմ, մայիսի 29–ի իմ մի գրառման արձագանքը հետեւյալն է․«Իսկ ինչու՞ դոմփել»։ Մնացած մասով փաստորեն կոնսենսուս ունենք, որ սրբապիղծ «սրբազանների» հարցը պետք է լուծել։

Իսկ առաջարկությունները, դիտողությունները, քննադատությունները «սրբազանների» մասին հետագա գրառումներում նկատի կունենամ։