ՀՀ երկրորդ նախագահ Ռոբերտ Քոչարյանը հարցազրույց է տվել TV5-ին։
«Զանգեզուրի միջանցքի» թեման ուղղակի կապ ուներ Արցախի ու Լաչինի միջանցքի հետ։ Հիմա Արցախն էլ չկա, Լաչինի միջանցքն էլ, բայց «Զանգեզուրի միջանցքի» հարցը կա։ Այն որպես առանձին թեմա՝ ապրում է. սա աբսուրդ է։ Սա դիվանագիտական ձախողման «գլուխգործոց է։ Սա նշանակում է, որ քո տարածքը դու վիճելի տարածք ես դարձնում։ Այլ պետություններ իրար հետ քննարկում են քո տարածքով միջանցքի ձևավորումը։ Միացյալ Նահանգներն է քննարկում Թուրքիայի հետ, Թուրքիան՝ Ադրբեջանի հետ, իսկ դու այդ թեմայում չկաս։ Սա այն տարբերակն է, երբ դու ոչ թե սեղանի շուրջ ես, այլ մենյուի մեջ ես, աշխարհաքաղաքական մենյուի մեջ ես»,- հարցազրույցում ասաց Ռոբերտ Քոչարյանը։
Քոչարյանը հիշեցրեց ՀՀ նախագահ Վահագն Խաչատուրյանի հայտարարությունը, թե Սյունիքի դարպասները պետք է բացել։ Նաև հիշեցրեց Թուրքիայի նախագահ Էրդողանի հայտարարությունը, թե Թուրքիան 2,8 միլիարդ դոլար է հատկացնում Կարս-Իդլիբ-Նախիջևան երկաթուղի կառուցելու համար։
«Սա նշանակում է, որ ենթադրյալ այդ ճանապարհով երկաթուղին ոչ թե Երասխով գալու է Հայաստան և Հայաստանի տարածքով մտնի Թուրքիա, այլ ուղղակի Նախիջևանից մտնելու է Թուրքիա՝ Իդլիբ-Կարս։ Ճանապարհների բացման հետ այդ ճանապարհը որևէ առնչություն չի ունենալու։ Սա լինելու է միջանցք՝ Թուրքիա-Ադրբեջան-Կենտրոնական Ասիայի երկրների հետ կապն ապահովող։ Հայաստանի օգուտն այստեղ ո՞րն է։ Յուրաքանչյուր մտածող մարդ թող վերցնի քարտեզը ու նայի՝ լավ, մենք այստեղ ի՞նչ ենք շահում»,- ՀՀ իշխանությունների՝ Սյունիքով ճանապարհ տալու պատրաստակամության վտանգները ներկայացրեց Երկրորդ նախագահը։
Չի կարող պետությունն իր ֆունկցիան արտապատվիրակել մասնավոր ընկերությանը. սա պետական ֆունկցիա է։ «Զվարթնոց» օդանավակայանի հետ համեմատելը, ըստ Ռոբերտ Քոչարյանի, աբսուրդ է, որովհետև «Զվարթնոցն» ամբողջությամբ մնում է մեր վերահսկողության տակ։
«Եթե Սյունիքի ճանապարհի վրա վթար լինի, ո՞ր ճանապարհային ոստիկանությունն է այն հետաքննելու, միջադեպը ո՞ր դատարանում է քննվելու, ո՞ր ննչական մարմիններն են զբաղվելու այդ ճանապարհի վրա կատարվող հանցագործություններով։
Միջանցքի խոստումը տվել են. ես դրանում կասկած չունեմ։ Այն, ինչի մասին Արցախում խոսել է Ալիևը, համոզված եմ, խոսել են Աբու Դաբիում»,-վստահ է նախագահը։
